VOV4.Jarai - Tơdơi kơ 4 hrơi mă bruă djơ̆ hrơi mông pơkă, mơguah lơ 7/10, ƀơi Anom bruă Ping gah, tui tơlơi git gai mơng Khua git gai Ping gah dêh čar ơi Nguyễn Phú Trọng, Jơnum lok 4 Khul apăn bruă Ping gah tal 13 hơmâo pơđut mông jơnum. Khul apăn bruă Ping gah lu tơlơi tŭ ư hrŏm, 9 blan laih rơgao tơlơi bơwih ƀong huă pok prong tŏ tui hơđong, huăč prăk kak hơmâo pơgăn hĭ, sit biă ñu, hmao tlôn bong glăi hăng ngă tui hơdôm hơdră djru kiăng hơkrŭ glăi, pơsir tơnap tap brơi mơnuih ƀon sang hăng anbom bơwih ƀong sĭ mơdrô bơbeč nao kơtang mơng klin Covid-19. Khua git gai Ping gah ơi Nguyễn Phú Trọng lăi pơtong, Kơnuk kơna hơmâo đing nao lăng glăi hơdôm tơlơi bơbeč nao kơtang, djop mơta lơm klin hơđut đĭ tal 4, pơčrông sai hơdôm hơdră bruă lăp djơ̆, djop mơta, tong ten kiăng kơ khut khăt pơgang klin, anăp nao hơkrŭ glăi tơlơi bơwih ƀong huă - mơnuih mơnam pơ anăp anai. Kơ bruă pơjing Ping gah, amăng tơlơi pơhiăp pơđut mong jơnum Khua git gai Ping gah ơi Nguyễn Phú Trọng lăi pơtong, jơnum hơmâo tŭ ư hrŏm bruă pơtrun tơlơi pơsit phrâo kơ hơdôm bruă mơnuih apăn bruă Ping gah ƀu dưi ngă; lăng anai lĕ akŏ bruă yôm phun kiăng kơ sem lăng, pơsir hĭ hơdôm tơlơi ngă soh mơng mơnuih apăn bruă Ping gah.

Siu Đoan: Pơblang