VOV4.Jarai - Tơdơi kơ 2 hrơi mă bruă, lơ 14/7, mông jơnum lok 58 mơng Jơnum min apăn bruă Khua pơ ala mơnuih ƀôn sang dêh čar ta pơđut. Khua git gai wai lăng pơ ala mơnuih ƀôn sang dêh čar ta ơi Vương Đình Huệ pơsit: truh mông anai, abih bang bôh yôm prăp lui kơ tal jơnum lok sa, Khua pơ ala mơnuih ƀôn sang dêh čar ta tal 15 hmâo ngă giong laih hăng prăp lui kơ hrơi pok phun lơ 20/7 pơ̆ anăp. Khua git gai wai lăng pơ ala mơnuih ƀôn sang dêh čar ta ơi Vương Đình Huệ pơsit, mông jơnum hmâo pơjing laih tơlơi tŭ ư hrom, pơlir hơbit prong, biă ñu hăng hơdôm kơčăo bruă 5 thun kơ pơđĭ kyar bơwih ƀong mơnuih mơnam, kơ tuh pơplai bruă hrom, gah prăk kak lŏn ia, kơčăo bruă čan prăk yua bruă hrom, tuh pơplai bruă hrom găp ƀrô 5 thun mơng thun 2021-2026. Ăt kah hăng hơdôm Jơlan hơdră pơkă mơng lŏn ia ta kơ pơdŏng plơi pla phrâo hăng hrŏ trun ƀun rin kơjăp mơng thun 2021-2025. Gah prăp lui kơ tal jơnum lok sa mơng Khua pơ ala mơnuih ƀôn sang, Khua git gai wai lăng pơ ala mơnuih ƀôn sang dêh čar ta ơi Vương Đình Huệ pơtă, hơdôm bôh ƀirô Khua pơ ala mơnuih ƀôn sang gum hrom kơjăp hăng Ding jum ia jrao, hơdôm bôh ƀirô bơdjơ̆ nao ƀôn prong Hà Nội prăp lui hơdôm hră pơ-ar, hơdôm jơlan gah bŏng glăi djơ̆ hăng tơlơi klin Covid-19 ngă kiăng pơhlôm abih bang hăng tal jơnum lok sa, Khua pơ ala mơnuih ƀôn sang tal 15./.

Siu H’ Prăk: Pô pơblang