VOV4.Jarai - Ƀơi mông jơnum pơplông ngui gah ling tơhan Jar kmar Army Games 2021, Grup tơhan Việt Nam dong mrô 7/42 boh dêh čar hăng kual lŏn nao pơplông. Anun lĕ tơlơi pơhing ƀơi mông Jơnum pơđut tơlơi pơplông ngui gah ling tơhan Jar kmar tal 7 (Army Games 2021) hơmâo pơphun ƀơi Moccow, dêh čar Nga. Tơdơi kơ lu hrơi pơplông, Grup tơhan Việt Nam nao pơplông Army Games thun 2021 hơmâo ngă giong djŏp bruă hơmâo jao, hơmâo tơlơi apah bơni yơ yôm amăng 4 tal nao pơplông ngui gah ling tơhan. Hơdôm tơlơi ƀing ta pơplông lêng rơgơi soh, dưi hloh ƀudah dưm kơnar hăng thun hlâo mah dêh čar pơkŏn nao pơplông lu hloh laih anun tơlơi pơplông thun anai tơnap hloh mơn. Ƀing krăp lăng tơlơi pơplông ƀơi Army Games 2021 lăi ƀing tơhan Việt Nam hơmâo pơtŏp klă, rơguăt bruă biă. Army Games lĕ hrơi mông kiăng ling tơhan Việt Nam hrăm tui ƀing gŏp, kơjăp pran nao blah, biă ñu lĕ bruă mă yua hăng djă pioh djŏp djuai phao kơtuang phrâo.

Siu H’Mai: Pơblang