VOV4.Jarai - Yua hơjan amăng sui hrơi, jơlan Trường Sơn Đông ară găn nao tơring glông Kon Plông, tơring čar Kontum lŏn tơhlŏm ngă răm rai. Hrŏm hăng bruă pơkra ming, amăng lơ 9/11, anom bruă bơdjơ̆ nao brơi pơdơi jang jai bruă đuăi nao rai amăng jơlan anai kiăng kơ pơhlôm rơnuk rơnua brơi rơdêh găn nao rai.

Jơlan lŏn tơhlŏm ngă rơdêh ƀu dưi găn nao rai

Anih lŏn tơlŏm kơtuai tui jơlan Trường Sơn Đông, ară găn nao tơring glông Kon Plông, tơring čar Kontum ƀơi ară Km 176+300 ataih mơng să Ngọc Tem giăm 1 km. Ƀơi anai, lŏn tơhlŏm glăm 2 met ngă tơhlŏm ƀiă abih jơlan ngă răm rai ƀơi kơsu tuh amăng jơlan glông 10m amra ngă jơlan čah abih. Anom bruă wai lăng jơlan mrô III.4 hơmâo git gai anom bruă wai lăng pơkiăo nao mơnuih, rơdêh nao kuăi hĭ lŏn.

Lŏn tơhlŏm dơlăm gah gŭ rŏng jơlan

Hlâo anun, anom bruă wai lăng jơlan mrô III.4 ăt rơkâo hơdôm anom bruă bơdjơ̆ nao amăng tơring čar Kontum lăi pơthâo brơi djop rơdêh găn nao rai thâo kơ bruă anai kiăng mơnuih ƀon sang thâo hăng weh hĭ, anăm găn nao rai kơtuai tui jơlan Trường Sơn Đông, ară găn nao tơring čar Kontum truh hrơi pơkra ming giong.

Siu Đoan Pơblang