VOV4.Jarai -  Amăng tal jơnum Khua pơ ala mơnuih ƀôn sang phrâo rơgao, lu khua pơ ala mơnuih ƀôn sang dêh čar ta lăi lĕ, hrom hăng hăng pok pơhai hơdôm jơlan gah wai lăng klin ruă Covid-19 lĕ, kiăng pok pơhai ba glăi bôh tơhnal hloh hơdôm hơdră bruă gum djru mơnuih ƀôn sang, mơnuih mă bruă, mơnuih mă yua mơnuih mă bruă bebeč mơng klin ruă. Hrom hăng anun, ƀing khua pơ ala mơnuih ƀôn sang ăt rơkâo mơn hơdôm ding jum, gơnong bruă dêh čar ta khom hmâo tơlơi gum hrom pơlir hơbit amăng bruă ngă rai hăng sĭ gơnam tam kơ anom bơwih ƀong hăng mơnuih ngă đang hmua.

Bơkơtuai kơ hơdôm jơlan gah pơgang pơgăn klin Covid-19, lu khua pơ ala mơnuih ƀôn sang lăi lĕ, hơdră pơtrun khop wai lăng klin ruă, samơ̆ tâ̆o hloh anăm mă yua hơdôm bruă hơdră ngă rơgao đơi ôh. Bôh nik hơdôm hrơi rơgao, hmâo hơdôm anih anom mă yua hơdôm bruă pơgang pơgăn klin rơgao hơnong đơi, ngă tơnap kơ mơnuih ƀôn sang, mơnuih mă bruă hăng anom bơwih ƀong amăng bruă dŭ pơgiăng gơnam tam, ngă hơdôm bruă dŭ pơgiăng gơnam tam kơplah wah hơdôm bôh anih anom bưp tơnap, đa lĕ ngă tơ̆i đưt hĭ.

Tui hăng khua pơ ala Phan Đức Hiếu, grŭp tơring čar Thái Bình, kiăng hmâo tơlơi kơtưn, gum hrom kơplah wah hơdôm anih anom, amăng pơgang pơgăn klin tui jơlan gah tŭ mă tơdruă hăng lăi pơdah tơlơi pơhing, kiăng gal brơi kơ bruă dŭ pơgiăng, ba hyu gơnam tam kơplah wah hơdôm anih anom:

“Amăng hơdôm hrơi kah hăng ră anai lĕ klin ruă ƀơi hơdôm anih anom pha ra biă hăng hơdôm bruă pơgang, pơgăn lĕ pha ra mơn. Amăng sa tơlơi hơpă thơ anun lĕ hơdôm bruă mă kiăng biă, samơ̆ tơdah kah hăng tơlơi pha ra kơplah hơdôm bruă pơgang, pơgăn klin ba truh tơlơi ngă gun kơ bruă ba hyu gơnam tam hăng ană mơnuih. Tui hăng tơlơi pơhing kâo thâo ră anai mơtăm ƀơi hơdôm glông jơlan prong ăt glăk hmâo tơlơi ngă gun gah gơnam tam anun bruă gum hrom kơplah wah hơdôm anih anom amăng hơdôm tơlơi anai lĕ hrŏ trun đut hlah tơlơi pơkă, jơlan gah pha ra ƀu kiăng đơi, amra ba truh kơtưn tơlơi ba hyu dŭ pơgiăng gơnam tam”.           

Pơblang kơ hơdôm jơlan gah pơsir kiăng ba hyu gơnam tam kơplah wah hơdôm anih anom, Khua Ding jum sĭ mơdrô dêh čar Nguyễn Hồng Diên brơi thâo, rơwang blung a pơgăn klin Covid-19, hơdôm anih anom ăt dô̆ tơguan, luk puk mơn ba truh bruă pơsir gơnam tam kiăng yua kơ mơnuih ƀôn sang bưp tơnap, kơƀah gơnam tam ƀơi sa dua bit anih yua tơ̆i đưn hĭ bruă ba hyu gơnam tam. Hơdôm tơlơi akă gal anai dưi hmâo hơdôm bôh ƀirô wai lăng, lăng ƀuh hăng đing nao hơdôm bruă pơsir:

“Ding jum sĭ mơdrô rơkâo gơnong bruă đang hmua pơtrut kơtang bruă pơkra gơnam ƀong huă, biă ñu añăm pơtăm, hơbơi pơtơi, bôt troh ƀơi anih hmâo klin ngă hăng hơdôm kual jum dar ăt kah hăng đơ đam dêh čar kiăng prap lui kơ bruă pơsir. Hơdôm gơnong bruă jơlan nao rai, kông ang, ia jrao, gong gai hơdôm anih anom, biă ñu lĕ hơdôm anih anom amăng kual klin ngă, ngă tui tơpă tơlơi črâo ba mơng Kơnuk kơna, Khua dêh čar ƀu ba tơbiă hơdôm tơlơi pơkă pơkon hăng mă yua măi mok hơdôm tơlơi pơkă. Hơdôm anih anom amăng kual khom pel ĕp dong, tañ djru hơdôm bôh anom bơwih ƀong pơpha hyu gơnam kiăng yua pioh dưi djă pioh amăng anih anom mơng 10 truh 15 hrơi djơ̆ hăng hrơi dô̆ čơlah; hrom hăng anun pơkra glăi kơjăp bruă gum hrom hluai tui siêu thị, sang čơ mơng đưm hlâo hăng sang čơ hmâo phun hmâo anăp nao hơdôm bôh sang čơ phun dong, pơđĭ kyar hơdôm djuai sĭ mơdrô kah hăng sĭ gơnam tam tui jơlan ba hyu hluai tui điện tử mơng ataih”.

Lu khua pơ ala mơnuih ƀôn sang ăt lăi mơn, hrom hrom hăng pok pơhai hơdôm jơlan gah wai lăng klin ruă lĕ khom pok pơhai ba glăi bôh tơhnal hloh hơdôm hơdră bruă djru mơnuih ƀôn sang, mơnuih mă bruă, mơnuih mă yua mơnuih mă bruă bơbeč yua kơ klin Covid-19 ngă. Lom ană mơnuih lĕ phun amra pơjing rai hơdôm tơlơi klă phrâo pioh wai lăng hăng pơtrut kơdun klin ruă. Ră anai, Kơnuk kơna hmâo lu hơdră bruă gum djru kah hăng: hrŏ trun nua apui lơtrik, ia, pơhrư̆i nô̆p prăk tuh jia, hrŏ trun sa dua mrô prăk, prăk apah, djru ječ mơnuih ƀôn sang, mơnuih mă bruă hăng pô mă yua mơnuih mă bruă. Khua pơ ala Vũ Thị Lưu Mai, grŭp Hà Nội lăi lĕ, bruă Kơnuk kơna pok pơhai tañ hơdôm anung prăk djru hăng pran jua amuñ ƀiă, ngă gal brơi kơ mơnuih dưi čơkă mă hơdră bruă, samơ̆ khom djơ̆ mơnuih, ƀu pơ-ư pơ-ang, ƀu ngă tui tŭ mơng hmâo ôh, hrom hăng anun khom lăng glăi bruă mă yua hơdră pel ĕp:

 “Yua kơ ră anai bôh nik ñu hăng sa dua bruă kah hăng tuh jia, bruă rô nao rai hăng dêh čar tač rơngiao, ƀing ta mă yua hơdră pel ĕp. Amăng tơlơi jŭ yap ƀu djơ̆ thơ amra hyu pơhrui ĕp, mă yua samơ̆ hăng anung djru brơi lĕ abih bang pha ra hăng ƀing ta lăng glăi djơ̆. Yua kơ lom jŭ yap mơnuih ƀôn sang kơnong kơ thâo nô̆p hră pơ-ar hăng bruă pơsit tơhnal djơ̆, anun lĕ bruă gơgrong wai lăng kơnuk kơna mơng ƀirô gong gai amăng ngă tui bruă hrom. Lom mă yua prăk kơ mơnuih ƀôn sang lĕ tŭ yap tơhnal lăp djơ̆. Mơta pơkon hơdră bruă gum djru lĕ pơdah tơlơi khăp păp ană mơnuih prong biă lĕ gru rŭp mơng Kơnuk kơna ba tơngan kiăng gum hrom mơnuih ƀôn sang găn rơgao tơnap tap. Yua anun, bruă pơsir ăt kiăng klă mơn”.

Kiăng ngă tui tơlơi pơtrun mrô 30 mơng Khua pơ ala mơnuih ƀôn sang tal 15, phrâo anai Kơnuk kơna hmâo mă yua Tơlơi pơtrun pơsit mrô 86 kơ hơdôm bruă kiăng ječ pơgang, pơgăn klin Covid-19. Hơdră pơsit anai dưi lăng lĕ pok jơlan, ngă gal brơi kơ hơdôm ding jum, gơnong bruă gơgrong hlâo hơdôm bruă pơgăn klin. Tơlơi yôm phăn hloh dong amăng tơlơi pơtrun pơsit, Kơnuk kơna hmâo hơdră pơtrun pơgăn klin khom sit nik, lăng kơjăp bôh nik hăng lăng bôh tơhnal yôm hloh. Lu tơlơi gum pơhiăp lăi lĕ, anai lĕ hơdră pơtrun djơ̆ hăng rơđah rơđông./.

Siu H’ Prăk: Pô pơblang