VOV4.Jarai - Ƀrô djơ̆ tal hơdor glăi 74 thun Hrơi pioh kơ Ling tơhan rơka ruă hăng pơsăn drơi drơi (27/7), Khul hơdôm bôh ƀirô dêh čar ta phrâo pơphun jơlan hơdră “Tuĭ apui hlin hơdor glăi mơng hơtai bôh” hluai tui anung prăk điện tử ƀơi hơdôm măi mok hơdeč hmar. Hơdôm hơdră gum hrom jơlan hơdră ƀu tơnap ôh. Khul hlăk ai, tơdăm dra ƀudah mơnuih ƀôn sang mă yua anung prăk điện tử MoMo kơ măi mok djă hyu hăng pơphun djru keh prăk “Tuĭ apui hlin hơdor glăi mơng hơtai bôh”. Tơdơi kơ gum pơčruh truh kih, lom tit lăi pơthâo jơlan link jơlan hơdră ƀơi hơdôm plăng facebook, mơnuih gum djru amra dưi pha brơi sa pok rŭp tŭ yap kiăng lar hyu dong bôh tŭ yua mơng jơlan hơdră kơ djop mơnuih. Prăk gum pơčruh hmâo mơng jơlan hơdră amra yua blơi apui hlin tuĭ ƀơi hơdôm bôh pơsat ling tơhan pơsăn drơi amăng rơwang Jơnum tuĭ apui hlin hơdor glăi ha amăng plĕ amăng đơ đam dêh čar amăng mơmot lơ 26/7 pơ̆ anăp; djru pơdŏng phrâo, pơkra glăi sang dô̆ hơdor tơngiă kơ mơnuih djru ngă hơkrŭ đưm./.

Siu H’ Prăk: Pô pơblang