VOV4.Jarai -  Yua kơ bơdjơ̆ nao kơthel tal 5 lom akô̆ blan 9 phrâo rơgao, ƀơi tơring glông Mdrak, tơring čar Daklak, hmâo laih tơlơi kyâu rơbuh djơ̆ glông gŏng hrĕ apui lơtrik 22KV, ngă djai apui ƀơi lu anih anom pơ̆ hơdôm bôh tơring glông Ea Kar hăng Mdrak. Tui hăng gơnong bruă apui lơtrik ƀơi anai, hăng rơbêh kơ 750 km jơlan glông hrĕ apui găn rơgao kual dlai kyâu pla, amăng bơyan hơjan kơthel, phun kyâu amra rơbuh ngă răm gŏng hrĕ apui prong biă. Gơnong bruă apui lơtrik čang rơmang mơnuih pla kyâu khom ngă tui, gum hrom klă dong kiăng pơhlôm glông gŏng hrĕ apui lơtrik, bĕ huĭ rơhyư̆t truh tơlơi hơdip hăng kông ngăn ană mơnuih.

Amăng krah rơwang blan 9, sang anô̆ ayong Vương Văn Hoàn, ƀơi thôn 7, să Čư̆ San, pơphun pơhrui rơbêh kơ 4 ektar phun keo klai. Ñu brơi thâo, yua kơ dlai kyâu keo hmâo jơlan glông hrĕ apui găn rơgao, anun hlâo kơ koh kyâu, sang anô̆ ñu khom lăi pơthâo kơ mơnuih apăn bruă apui lơtrik nao pơtô brơi koh kyâu pơhlôm klă.

“Ƀơi đang hmua lĕ abih bang leng kơ pla keo sôh. Blung a pla ăt giăm hăng glông hrĕ apui mơn. Tơdơi anai hmư̆ hing lăi mơng bơnah anom bruă apui lơtrik ƀing gơmơi rŏng jah agaih pơhư prong mơn glông pơdŏng gŏng hrĕ apui kiăng pơhlôm tơlơi hơdip mơng sang anô̆”.

Rim ektar đang keo klai pơhrui hmâo hơnong ñu mơng 60 – 80 klăk prăk, jing prăk bơwih ƀong phun mơng mơnuih ƀôn sang Čư̆ San, Mdrak

Tui hăng ơi Thào Seo Lử, Khua thôn 7, să Čư̆ San, ƀơi kual asuek ataih mơng kual krah tơring glông rơbêh kơ 50 km, dưi mă yua apui lơtrik dêh čar ta lĕ tơlơi mơ-ak prong biă mơng neh wa. Yua anun bruă djă pioh pơhlôm hơđong kơ jơlan glông hrĕ apui găn rơgao ăt lĕ bruă gơgrong mơng mơnuih ƀôn sang mơn.

 “Mơng thun 2007 dưi dăng apui lơtrik dưm truă anom pơđoh apui rai pơ̆ anai mơnuih ƀôn sang ƀing gơmơi mơ-ak biă, bơni kơ Ping gah, Kơnuk kơna hăng bơnah gah apui lơtrik biă. Tơlơi bơwih ƀong ƀing gơmơi ƀơi anai biă ñu gơnang kơ pla kyâu keo. Truh bơyan hơjan kơthel kâo ăt pơtă pơtăn na nao kơ neh wa ƀu dưi lui raih ôh phun kyâu rơbuh djơ̆ gŏng hrĕ apui thơ bơdjơ̆ nao tơlơi hơdip neh wa”.

Amra hmâo kyâu keo klai rơbuh djơ̆ ƀơi plăng gŏng hrĕ apui lơtrik 22KV pơ̆ Čư̆ San

Đơ đam să Čư̆ San hmâo 4800 bôh sang anô̆, abih bang kah hăng djuai ania Mông hăng Dao mơng hơdôm tơring čar gah Pơngŏ dêh čar rai dô̆. Ơi Phạm Đăng Đảng, Khua Jơnum min mơnuih ƀôn sang să Čư̆ San brơi thâo, lŏn prong samơ̆ kơdư kla anun bruă bơwih ƀong mơng dlai lĕ phun pơhrui glăi prăk kak, djơ̆ hăng jơlan gah ngă đang hmua mơng djuai ania ƀiă. Pla kyâu keo ƀu rơngiă pran bơwih brơi, kơnong kơ yua ƀiă prăk blung a pla. Tơdơi kơ mơng 4-5 thun, hơnong ñu rim ektar đang keo pơhrui hmâo mơng 60 truh 80 klăk prăk. Yua anun, lom pla phun keo, neh wa leng tŭ mă djop anô̆ gal mơng lŏn, đa phun pla amăng kual pơdŏng gŏng hrĕ apui lơtrik dong.

“Amăng hơdôm hrơi rơgao gơnong bruă apui lơtrik hăng plơi pla hmâo gum hrom klă biă amăng lăi pơhing pơsur neh wa, khă hnun hai ăt dô̆ mơn sa dua kual akă ngă tui abih bruă tui tơlơi pơkă mơng gơnong bruă apui lơtrik. Yua kơ tơdah ngă tui anun lŏn pla mơng neh wa rơngiă hĭ lu biă. Gong gai plơi pla hrom hăng gơnong bruă apui lơtrik lăi pơhing na nao pơsur gum hrom neh wa kiăng ngă hiưm hơpă djơ̆ hrom pơhlôm bơwih ƀong mơng mơnuih ƀôn sang hăng pơhlôm kơ glông hrĕ apui”.

Mơnuih mă bruă gah apui lơtrik pơsir tơlơi truh yua phun kyâu rơbuh djơ̆ ƀơi glông hrĕ apui pơ̆ Mdrak lom lơ 12/9

Ơi Nguyễn Công Hướng, Kơ-iăng Khua Anom apui lơtrik Ea Kar, brơi thâo, tui tơlơi pơkă, mơnuih ƀôn sang dưi pla ataih mơng glông gŏng hrĕ apui ƀiă biă ñu 3m. Khă hnun hai, yua kơ phun keo klai amra dlông rơbêh kơ 15m, phun kyâu amra rơbuh jôh djơ̆ glông gŏng hrĕ apui, anun khom pla ataih jơlan gŏng hrĕ apui 20m anun kah mơng pơhlôm. Ră anai anom bruă apui lơtrik Ea Kar glăk wai lăng mă yua rơbêh kơ 750 km jơlan gŏng hrĕ apui lơtrik găn nao ƀơi 2 bôh tơring glông Ea Kar hăng Mdrak, biă ñu găn rơgao hơdôm kual kơdư čư̆ hmâo đang kyâu pla. Amăng bơyan hơjan kơthel, hmâo tơlơi truh bơdjơ̆ nao glông hrĕ apui yua kơ phun kyâu rơbuh jôh djơ̆ hrĕ apui.

Lơ 11/9 phrâo rơgao, yua bơdjơ̆ nao mơng kơthel tal 5, hơjan prong angin kơtang hmâo lŏn tơhlom, phun kyâu rơbuh djơ̆ jơlan hrĕ apui 22KV gah glông jơlan 471F18 kơplah wah Ea Kar hăng Mdrak, ngă djai apui ƀơi 11.600 bôh sang anô̆. Hơdôm anih anom hmâo tơlơi truh ƀơi kual čư̆ siăng tơnap nao rai, tơnap kơ bruă hơkrŭ pơsir. Yua anun, kiăng pơhlôm kơ glông gŏng hrĕ apui amăng bơyan hơjan, ia ling dăo, gơnong bruă apui lơtrik kiăng biă tơlơi gum hrom mơng mơnuih ƀôn sang.

“Hăng anô̆ pha ra glông hrĕ apui găn rơgao lu kual đang pla kyâu lĕ tơnap prong biă mơng ƀing gơmơi amăng bruă wai lăng pơđoh apui yua. Pơ̆ anăp anai Apui lơtrik Ea Kar hmâo lu dong jơlan gah pơsir hrom hrom hăng anun, kah hăng gum hrom dong hăng gong gai ƀơi anai lăi pơhing kiăng neh wa thâo hluh hăng tŭ ư hrom hăng gơnong bruă apui lơtrik, gum hrom klă hloh dong hăng gơnong bruă apui lơtrik kiăng pơhlôm glông jơlan apui lơtrik ăt kah hăng amăng bruă mă yua apui pơhlôm, biă ñu lĕ amăng bơyan hơjan kơthel”.

Apui lơtrik hmâo bôh yôm phăn pioh pơđĭ kyar bơwih ƀong mơnuih mơnam. Yua anun, mơnuih ƀôn sang khom ngă tui djơ̆ tơlơi pơkă pơhlôm glông plăng jơlan hrĕ apui, ƀu djơ̆ kơnong kơ pơgang tơlơi hơdip drơi pô hăng sang anô̆ ôh mơ̆, ñu dô̆ djru djă pioh apui yua ƀu tơ̆i đưn kơ bruă mă yua amăng sang anô̆ hăng kơ đang hmua dong./.

Siu H’ Prăk: Pô pơblang