VOV4.Jarai-Mơguah lơ 4/1, ƀơi sang jơnum khua mua pơ ala mơnuih ƀôn sang dêh čar pok jơnum ƀu pơkă hlâo tal 15 tui hơdră mơ̆ng ataih, lăng nao rai amăng tivi hăng 62 bit anih djop tơring čar, ƀôn prong.

Hlâo kơ pok jơnum, ƀing khua mua pơ ala jơnum pơ sang bruă khua pơ ala dêh čar nao dưm guang bơnga, čuă pơsat jep Khua mir sir Hồ Chí Minh. Pơhiăp git gai jơnum, ơi Vương Đình Huệ, Khua git gai pơ ala mơnuih ƀôn sang dêh čar lăi pơthâo anăp mă bruă, jơnum bơkơtuai yôm, anun lĕ, sem glăi hăng pơsit hră pơtrun prăk kăk, jơlan hơdră pơkă kơ prăk kăk djru Hơdră rŭ glăi hăng pơđĭ kyar bơwih ƀong huă mơnuih mơnam; sem glăi, pơsit Hră pơtrun kơ Jơlan hơdră tuh pơ alin Kơčăo bruă čuk pơkra jơlan rơdêh đuăi hmar mơ̆ng Kơdư nao pơ Dơnung gah Ngŏ mơ̆ng thun 2021-2025.

Mông jơnum lăng abih bang

Ƀơi mông jơnum anai, khua mua pơ ala sem glăi, pơsit Kơčăo tơlơi phiăn čih pơkra glăi, pơhrua nao dơ̆ng Tơlơi phiăn tuh pơ alin kơ bruă čar, Tơlơi phiăn tuh pơ alin tui hluai bơnah ngă hrom kơnuk kơna hăng ană plơi, Tơlơi phiăn tuh pơ alin, tơlơi phiăn juă nua, tơlơi phiăn apui lơtrik, tơlơi phiăn anom bruă sĭ mơdrô, tơlơi phiăn duh jia yôm phara hăng tơlơi phiăn ngă tui kơđi laih phat amăng bruă mơnuih ƀôn sang. Tơdơi kơ pok jơnum mơtam, khua mua pơ ala mơnuih ƀôn sang hmư̆ Kơnuk kơna lăi pơthâo Hră čih pơkra 3 kơčăo bruă čih hră pơtrun hăng 1 tơlơi phiăn.

Nay Jek: Pơblang