VOV4.Jarai - Mơguah lơ 5/7, ƀơi Ƀirô mă bruă Ping gah dêh čar ta, Jơnum tal 3 Grŭp mă bruă Ping gah dêh čar ta tal 13 hmâo pok phun yôm phăn. Jơnum Ping gah tal anai hmâo bruă mă: Bơkơtuai, pơsit sa dua mơta tơlơi yôm phăn kah hăng: Kơčăo bruă pơđĭ kyar bơwih ƀong – mơnuih mơnam rơwang 5 thun 2021-2025; pel ĕp, mă yua Tơlơi pơkă mă bruă mơng Grŭp mă bruă Ping gah dêh čar, Ding jum kơđi čar, Grŭp git gai bruă Ping gah hăng Tơlơi pơkă mă bruă mơng Jơnum min pel ĕp kơđi tơlơi Ping gah rơwang bruă tal 13;

Khua git gai Ping gah dêh čar ơi Nguyễn Phú Trọng pơhiăp amăng mông pok phun jơnum

Pơkă ngă tui kơ Phiăn pơkă mơng Ping gah hăng Tơlơi pơkă kơ bruă pel ĕp, lăng tui, pơsir kơđi tơlơi mơng Ping gah rơwang bruă tal 13; ngă giong dong ruah mơnuih apăn bruă git gai mơng hơdôm bôh ƀirô kơnuk kơna rơwang bruă Khua pơ ala mơnuih ƀôn sang dêh čar tal 15 kiăng Khua pơ ala mơnuih ƀôn sang ruah ƀudah pơsit amăng Tal jơnum lok sa mơng Khua pơ ala mơnuih ƀôn sang dêh čar tal 15 pơ̆ anăp; hăng sa dua mơta tơlơi yôm phăn pơkon. Pơhiăp amăng mông pok phun jơnum, Khua git gai Ping gah dêh čar ta ơi Nguyễn Phú Trọng lăi rơđah anai lĕ hơdôm kơčăo bruă yôm phăn biă, prong prin, hmâo bôh tŭ yua pơsit hăng bruă ngă giong truh kih tơhnal pơkă, bruă pơđĭ kyar bơwih ƀong – mơnuih mơnam yua kơ Jơnum prong tal 13 mơng Ping gah hmâo ba tơbiă./.

Siu H’ Prăk: Pô pơblang