VOV4.Jarai - Mơguah anai (14/6), ƀơi Sang mă bruă Khua pơ ala mơnuih ƀôn sang dêh čar ta, pok phun jơnum tal 57 mơng Jơnum min apăn bruă Khua pơ ala mơnuih ƀôn sang dêh čar. Pơphun amăng dua hrơi, hrơi anai hăng hrơi pơgi, amăng mông jơnum anai Jơnum min apăn bruă Khua pơ ala mơnuih ƀôn sang dêh čar amra gum pơhiăp kơ lu bôh yôm phăn. Khua git gai wai lăng pơ ala mơnuih ƀôn sang dêh čar ta ơi Vương Đình Huệ pơhiăp amăng mông pok phun, pơđut hăng gum hrom hăng ƀing Kơ-iăng Khua git gai wai lăng pơ ala mơnuih ƀôn sang dêh čar ta pơplih mông git gai jơnum. Tui hăng jơlan hơdră pơkă lăng hlâo, Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ Tơlơi lăi pơthâo glăi klah čun yak blung a bruă ruah khua pơ ala mơnuih ƀôn sang tal 15 hăng khua pơ ala Khul pơ ala mơnuih ƀôn sang hơdôm gưl rơwang bruă 2021-2026. Gum pơhiăp kơ tơlơi pơkă hlâo Jơlan hơdră pơdŏng tơlơi phiăn, phiăn pơtrun thun 2022 mơng Khua pơ ala mơnuih ƀôn sang. Gum pơhiăp kơ bruă prăp lui tal jơnum lok sa Khua pơ ala mơnuih ƀôn sang dêh čar ta tal 15./.

Siu H’ Prăk: Pô pơblang