VOV4.Jarai - Mơguah lơ 7/12, ƀơi Sang rông Ngọc Linh, plơi prong Kontum, Khul pơ ala mơnuih ƀôn sang tơring čar Kontum tal 12 pok phun tal jơnum lok 2. Amăng tal jơnum anai, Khul pơ ala mơnuih ƀôn sang tơring čar Kontum amra pel ĕp, bơkơtuai hăng pơsit lu bôh yôm phăn gah tơlơi dưi pô. Tơlơi lăi pơthâo glăi mơng Jơnum min mơnuih ƀôn sang tơring čar Kontum amăng tal jơnum brơi ƀuh, khă khom bŏng glăi hăng lu tơlơi tơnap, tơlơi lông hăng bơdjơ̆ nao mơng klin ruă Covid-19, samơ̆ thun 2021 tơlơi bơwih ƀong – mơnuih mơnam tơring čar Kontum ăt hmâo mơn hơdôm bôh than yôm phăn, kah hăng: Abih bang gơnam mơnuih mơnam đĭ 6,47%; Hơdră bơwih ƀong pơplih djơ̆ jơlan gah pơsit; pơhrui glăi hơnong ñu rim čô mơnuih hmâo 47 klăk prăk; Pơhrui ngăn drăp Kơnuk kơna 3.500 klai prăk, hmâo 100% rơnoh pơkă hlâo ƀơi tơring čar; Tơring čar hmâo dong 8 bôh să djơ̆ hăng plơi pla phrâo; Mrô sang anô̆ ƀun rin hrŏ trun 4% bơhmu hăng thun 2020; Bruă pơgang, pơgăn klin Covid-19 dưi ngă tui tơpă. Amăng 2,5 hrơi pơphun tal jơnum lok 2, Khul pơ ala mơnuih ƀôn sang tơring čar Kontum amra pioh lu mông kơ ƀing khua pơ ala pơblang, ngă rơđah bôh than ba truh sa dua tơhnal pơkă thun 2021 ƀu djơ̆ hăng kơčăo bruă, kah hăng: mrô anom bơwih ƀong pơdŏng phrâo kơnong kơ hmâo giăm truh 80%; kual lŏn pla phrâo sâm Ngọc Linh kơnong kơ hmâo 67%... Hrom hăng anun đing nao bơkơtuai tơhnal pơkă, bruă mă hăng hơdôm jơlan gah pơsir pơđĭ kyar bơwih ƀong mơnuih mơnam, pơhlôm pơgang rơnuk rơnua plơi pla thun 2022./.

Siu H’ Prăk: Pơblang