VOV4.Jarai -  Mơguah lơ 18/10, Khul pơ ala mơnuih ƀôn sang ƀôn prong Hồ Chí Minh tal X pok phun tal jơnum lok 3. Ding kơna Ding jum kơđi čar, Khua git gai Ping gah ƀôn prong Hồ Chí Minh, ơi Nguyễn Văn Nên nao pơhmư̆ tal jơnum. Hlâo kơ pơphun tal jơnum, ƀing khua pơ ala hmâo pioh laih sa mơnit kơ hơdôm mơnuih ƀôn sang hăng ƀing apăn bruă, ling tơhan, hơdôm khul grŭp pơgăn klin rơngiă amăng tal klin Covid-19 anai. Anai ăt lĕ tal jơnum yôm phăn pioh pơsit glăi abih bang bruă pơgang, pơgăn klin Covid-19 hăng hơdôm jơlan gah hơkrŭ glăi bruă bơwih ƀong. Yap truh lơ 17/10, tơlơi klin ruă ƀơi ƀôn prong Hồ Chí Minh hmâo tơlơi klă ƀiă laih, mrô mơnuih ƀă kơman klin hrŏ trun ƀơi rơnoh 3 mrô, mrô mơnuih djai hrŏ trun dô̆ 2 mrô; mrô mơnuih tlâ̆o vaccine pơgang ară tal sa kơ mơnuih mơng 18 thun hăng lu hloh hmâo 99%, ară tal 2 rơbêh kơ 76%. Hrom hăng hơdôm bôh tơhnal dưi ngă, ƀôn prong ăt pơsit mơn anô̆ ƀu klă pioh glăi prong yua kơ klin ba truh. Tal jơnum amra pioh mông pơsit abih bang tơlơi bơwih ƀong - mơnuih mơnam 9 blan hăng bruă pơsir hơdôm blan dô̆ glăi; ngă rơđah bôh than ba truh, biă ñu bôh than gơgrong hlâo mơng hơdôm gưl plơi pla, anom bruă hăng ba tơbiă hơdôm jơlan pơsir djơ̆./.

Siu H’ Prăk: Pô pơblang