VOV4.Jarai - Lơ 13/9, Jơnum min khua apăn bruă pơ ala mơnuih ƀon sang dêh čar jơnum lok 3, him lăng jơnum sui truh lơ 22/9. Pơhiăp ƀơi mông jơnum, Khua git gai pơ ala mơnuih ƀon sang ơi Vương Đình Huệ brơi thâo, ƀơi mông jơnum anai, Jơnum min khua apăn bruă pơ ala mơnuih ƀon sang dêh čar pơgôp hiăp kơ hơdôm tơlơi yôm phun pơdah pơƀuh kơ Khua mua git gai pơ ala mơnuih ƀon sang ƀơi mông jơnum lok 2 hăng sem lăng hơdôm bruă yua Jơnum min khua apăn bruă pơ ala mơnuih ƀon sang dêh čar dưi pơsit, hơmâo 5 mơta tơlơi phun.

Khua git gai pơ ala mơnuih ƀon sang ơi Vương Đình Huệ pơhiăp ƀơi mông jơnum.

Ăt ƀơi mông jơnum anai mơn, Jơnum  min khua apăn bruă pơ ala mơnuih ƀon sang dêh čar pơgôp hiăp kơ Tơlơi pơtrun ngă lăng hlâo sa, dua tơlơi djru phara hơjăn kiăng pơđĭ kyar ƀơi tơring čar Thanh Hoá; sem lăng, pơsit bruă akŏ pơdong plơi prong Từ Sơn, tơring čar Bắc Ninh; sem lăng, pơtrun sa, dua tơlơi pơkôl pơkă kơ lui hĭ mă prăk jia ƀơi anom bơwih ƀong, mơnuih tơnap kơtang yua klin Covid-19 ngă; pơgôp hiăp kơ Kơčăo bruă pơhlôm hơmâo djŏp ia yua hăng rơnuk rơnua ƀơi dơnao kŏng ia thun 2021-2030, anăp nao truh thun 2045.

Siu H’Mai: Pơblang