VOV4.Jarai - Mơguah lơ 10/12, ƀơi Sang ia jrao tơhan 175, Anom pơtô bruă Ping gah dêh čar, Hră pơhing Điện tử Ping gah Cộng sản Việt Nam ngă hrŏm jơnum Boh thâo ia rơgơi “30 thun pơmut hrŏm ia jrao tơhan mơnuih ƀon sang ƀơi ia rơsĭ, bul pơtâo ia rơsĭ” kiăng pơtŏng glăi hơdôm tơlơi dưi ngă mơng bruă anai amăng 30 thun, čih pioh lui hơdôm tơlơi kiăng hrăm, hăng ba tơbiă hơdră ngă bruă đah mơng pơtrut tui bruă anai amăng thun blan pơ anăp. Amăng 30 thun, jơlan hơdră anai hơmâo ngă giong laih bruă wai lăng ba tơlơi suaih pral kơ mơnuih ƀon sang hăng ƀing tơhan ƀơi kual ia rơsĭ, bul pơtâo ia rơsĭ; ngă kơjăp tui sang ia jrao ƀơi 972 boh să, amăng anun, hơmâo 597 boh să pơ kual ataih, kual asuek, guai lŏn ia, bul pơtâo ia rơsĭ. Biă ñu lĕ dưi akŏ pơdong 5 hơbô bruă pơmut hrŏm bruă mă mơng sang ia jrao tơring glông hăng grup ia jrao tơhan gah Anom bruă git gai tơhan tơring glông. Rơbêh 40 tơlơi čih ba bơkơtuai hơmâo ngă rơđah hloh tơlơi yôm gah bruă čar mơng bruă pơmut hrŏm ia jrao tơhan mơnuih ƀon sang ƀơi kual ia rơsĭ; pơsit anai lĕ jơlan ngă bruă lăp djơ̆ mơng Ping gah, Kơnuk kơna, ƀu kơnong djru lăng ba tơlơi suaih pral kơ mơnuih ƀon sang, ling tơhan đôč ôh mơ̆ bruă anai yôm biă hăng bruă iâu pơthưr pơtô ba mơnuih ƀon sang, hơkrŭ kơjăp tui pran jua mơnuih ƀon sang gum wai lăng ba rơnuk rơnua đah mơng dưi pơgang ba lŏn ia ta.

Siu H’Mai: Pơblang