VOV4.Jarai - Hrơi anai lơ 4/1, ƀơi sang bruă Khua git gai pơ ala mơnuih ƀon sang dêh čar pơphun jơnum ƀu prăp lui hlâo, sem lăng, pơsit 4 mơta tơlơi yôm phun, kiăng ngă ječ kơ bruă hơkrŭ glăi hăng pơđĭ kyar tơlơi bơwih ƀong huă-mơnuih mơnam. Anai lĕ mông jơnum aka ƀu phiah hơmâo djơ̆ ôh, pơdah pran jua pơplih phrâo gum hrŏm hăng Kơnuk kơna mơng Khua mua git gai pơ ala mơnuih ƀon sang dêh čar tal 15. Ƀirô khua pơ ala mơnuih ƀon sang sem lăng, pơsit 4 mơta tơlơi yôm phun, amăng anun hơmâo Tơlơi pơtrun kơ bruă prăk kăk, prăk djru ngă Jơlan hơdră hơkrŭ hăng pơđĭ kyar tơlơi bơwih ƀong huă - mơnuih mơnam. Tơlơi pơtrun anai yôm hăng kiăng ječ biă mă, đah mơng dưi ngă hơdôm tơlơi kiăng ƀơi anăp. Kư tri hăng mơnuih ƀon sang glăk tơguan kơ bruă djru gah prăk kăk hơmâo Khua git gai pơ ala mơnuih ƀon sang dêh čar pơsit ƀơi mông Jơnum anai amra jing hơdră pơsir tañ, hmao tlôn, hơmâo hrơi pơkă đah mơng dưi hơkrŭ hăng pơđĭ kyar tơlơi bơwih ƀong, laih dong pơhlôm ngă dưm kơnar tơlơi bơwih ƀong, djơ̆ hăng tơlơi kiăng ƀơi anăp, hăng sui thun nao hrŏm hăng Akŏ bruă pơplih glăi tơlơi bơwih ƀong huă rơwang thun 2021-2025.

Siu H’Mai: Pơblang