VOV4.Jarai - Jơnum lok 4 Jơnum min apăn bruă Khua pơ ala mơnuih ƀon sang dêh čar pơphun amăng mơguah hrơi anai (11/10). Jơnum sui 4 hrơi, jơnum anai amra pơgôp hiăp amăng lu boh tơhnal yôm phun, amăng anun hơmâo bruă mă yua lŏn mơnai rơwang thun 2021-2030, anăp nao thun 2050 hăng akŏ bruă mă yua lŏn mơnai 5 thun (2021-2025). Kơ bruă čih pơkra tơlơi phiăn Jơnumin apăn bruă Khua pơ ala mơnuih ƀon sang dêh čar pơgôp hiăp kơ črăn tơlơi phiăn, pơhrua sa dua tơlơi - Hơnong pơkă jŭ yap dêh čar hăng tơlơi phiăn jŭ yap; hơdôm črăn tơlơi pơsit amăng bruă ngă tui lông lăng hơdôm hơdră bruă akŏ phun amăng pơđĭ kyar djop tơring čar, ƀôn prong Hải Phòng, Nghệ An, Thừa Thiên Huế. Kơ bruă bơwih ƀong huă-mơnuih mơnam hăng ngăn drăp kơnuk kơna, Jơnum min apăn bruă Khua pơ ala mơnuih ƀon sang dêh čar hơmâo pơgôp hiăp kơ hră lăi pơthâo mơng Kơnuk kơna kơ bruă wai lăng hăng mă yua rơnoh prăk amăng hră pơhlôm nua ia jrao thun 2020; 2 thun (2019-2020) ngă tui tơlơi pơsit mrô 68/2013/QH13 kiăng pơtrut kơtang amăng bruă ngă tui hơdră bruă, tơlơi phiăn amăng hră pơhlôm nua ia jrao, pơ anăp kiăng kơ abih bang lêng kơ hơmâo hră pơhlôm nua ia jrao; boh than ba glăi lơ̆m ngă tui akŏ bruă pơđĭ kyar bơwih ƀong huă - mơnuih mơnam hăng jŭ yap ngăn drăp Kơnuk kơna thun 2021, akŏ bruă pơđĭ kyar bơwih ƀong huă-mơnuih mơnam thun 2022l jŭ yap ngăn drăp kơnuk kơna hăng hơdră kah pha mă yua ngăn drăp kơnuk kơna thun 2022…

Siu Đoan: Pơblang