VOV4.Jarai - Mơguah lơ 4/10, Jơnum lok 4 Khua apăn bruă git gai Ping gah tal 13 hơmâo pơphun kơdrưh yôm ƀơi Hà Nội, Khua git gai Ping gah ơi Nguyễn Phú Trọng git gai hăng hơmâo tơlơi pơhiăp ƀơi mông jơnum yôm anai. Jơnum tal anai amra bơkơtuai, pơgôp hiăp kơ bruă pơgang klin Covid-19, hăng tơlơi pơmin, hơdră ngă bruă pơgang klin amăng mông anai; tơlơi bơwih ƀong huă - mơnuih mơnam thun 2021, akŏ bruă pơđĭ kyar bơwih ƀong huă - mơnuih mơnam thun 2022; bruă prăk kăk kơnuk kơna 3 thun 2022-2024; Jơlan hơdră kơdun glăi hrơi pơplih hơdră apah prăk blan tui Tơlơi pơtrun jơnum mrô 27-NQ/TW mơng Jơnum lok 7 Khua git gai Ping gah tal 12 hăng sa dua bruă yôm pơkŏn dong hăng bruă ngă truh kih Jơnum khua mua Ping gah dêh čar tal 13, hơmâo tom bruă kiăng ngă yôm phun lĕ pơđĭ kyar bơwih ƀong huă - mơnuih mơnam hăng ngă tui bruă yôm phun lĕ akŏ pơjing, pơplih klă Ping gah, Khua git gai Ping gah ơi Nguyễn Phú Trọng ha wơ̆t dong kiăng Ping gah Kơnuk kơna pơtrut hloh tơlơi gơgrong bruă, kơsem min, bơkơtuai nao rai, pơgôp hiăp kiăng ngă pơgiong hĭ hơdôm hră lăi pơthâo, kơčăo bruă, tơlơi tum pơƀut klah čun mơng Kơnuk kơna hăng sem lăng, pơsit amăng mông jơnum tal rơnuč. Mông Jơnum him lăng amra ngă bruă truh lơ 7/10.

Siu H’Mai: Pơblang