VOV4.Jarai - Mơguah hrơi anai (22/11), ƀơi Sang jơnum Khua git gai pơ ala mơnuih ƀon sang dêh čar, pơphun Jơnum lok 5 mơng Jơnum min apăn bruă git gai pơ ala mơnuih ƀon sang dêh čar. Mông jơnum hơmâo pơphun amăng 2 hrơi, amăng anun, Jơnum min apăn bruă pơgôp hiăp kơ lu tơlơi yôm. Gah bruă čih pơkra tơlơi phiăn, Jơnum min apăn bruă git gai pơ ala mơnuih ƀon sang dêh čar pơgôp hiăp kơ Tơlơi pơtrun mơng Jơnum min apăn bruă git gai pơ ala mơnuih ƀon sang pơblang rơđah hơdôm tơlơi hơmâo mơng Tơlơi phiăn Hình sự. pơgôp hiăp kơ tơlơi rơkâo mơng Kơnuk kơna kơ bruă pơhrua 2 kơčăo bruă Tơlơi phiăn amăng Jơlan hơdră čih pơkra tơlơi phiăn, phiah phiăn thun 2022, anun lĕ Tơlơi phiăn pơplih pơkra, pơhrua tui sa, dua tơlơi mơng Tơlơi phiăn Tần số vô tuyến điện; Tơlơi phiăn Khăm pơjrao tơlơi ruă (pơplih pơkra glăi); laih dong pơgôp hiăp kơ bruă kĭ Hră pơkôl Prăk pơhlôm nua mơnuih mơnam kơplah wah Kơnuk kơna Việt Nam hăng Kơnuk kơna Hàn Quốc. Ƀơi mông jơnum anai, Jơnum min apăn bruă git gai pơ ala mơnuih ƀon sang dêh čar ăt sem lăng hră lăi pơthâo glăi bruă yua prăk wai lăng Keh prăk pơhlôm nua mơnuih mơnam thun 2019-2021 hăng pơsit rơnoh prăk wai lăng Keh prăk pơhlôm nua mơnuih mơnam thun 2022-2024. Sem lăng tơlơi lăi pơthâo glăi bruă wai lăng hră tơlơi phiăn yua Khul wai lăng djuai ania, hơdôm Jơnum min mơng Ƀirô khua git gai pơ ala mơnuih ƀon sang gơgrong.

Siu H’Mai: Pơblang