VOV4.Jarai - Mơguah lơ 14/12, Jơnum tui tơđar rim thun Khua pơ ala mơnuih ƀon sang kual ASIA - Thái Bình Dương tal 29 (APPF 29) yua Anom bruă git gai pơ ala mơnuih ƀon sang dêh čar Hàn Quốc git gai pơphun lăng nao rai amăng tivi, hơmâo pơphun kơdrưh kơ-ang biă. Pơhmư̆ mông jơnum hơmâo năng ai 150 čô khua mơng hơdôm bruă bruă pơ ala mơnuih ƀon sang ding kơna APPF, ƀing krăp lăng bruă hăng ƀing tuai. Grup khua pơ ala mơng Việt Nam yua Khua git gai pơ ala mơnuih ƀon sang ơi Vương Đình Huệ ngă khua grup nao pơhmư̆ tom. Pơhiăp ƀơi mông pơphun jơnum, Khua mir sir dêh čar Hàn Quốc ơi Moon Jae-in lăi, anom bruă pơ ala mơnuih ƀon sang yôm biă mă, pơ ala kơ tơlơi pơhiăp mơng mơnuih ƀon sang, pơtrut hơmâo hơdră djru đah mơng ba lŏn ia pơwơ̆t glăi tui hơđăp. Khua mir sir dêh čar Hàn Quốc Moon Jae-in jak iâu djŏp ding kơna amăng APPF pơdah tơlơi gơgrong bruă git gai prăp lui kơ rơnuk phrâo; laih dong pơdah tơlơi čang rơmang, Jơnum APPF 29 dưi pơphun truh kih, hruă tui dong tơlơi ngă hrŏm lu bơnah, ngă hrŏm rŭ glăi tơlơi bơwih ƀong tơdơi kơ thun blan hơmâo klin, yua kơ tơlơi hơdip pơ anăp anai hiam hloh, pơsit tơlơi pơtom hiăp klă hiam amăng mông anai.

Siu H’Mai: Pơblang