VOV4.Jarai - Lơ 29/6, Khua dêh čar ta ơi Phạm Minh Chính git gai mông jơnum Kơnuk kơna akô̆ bruă čih pơkra tơlơi phiăn blan 6/2021, kiăo tui anun pioh sa hrơi pel ĕp, lăng glăi bruă čih pơkra hăng ngă tui tơlơi phiăn kiăng tañ pơtlaih hơdôm tơlơi tơnap, tơlơi gun kơ hơdră pơkă, hơdră bruă, bơwih brơi mơnuih ƀôn sang hăng anom bơwih ƀong klă hloh. Anai lĕ sa amăng hơdôm bruă mă phun mơng Kơnuk kơna. Amăng mông jơnum ƀing khua pơ ala hmâo bơkơtuai, hơduah lăng 8 bôh yôm: Rơwang bruă Tơlơi phiăn tơhan polih hơdeč hmar; rơwang bruă Tơlơi phiăn pơplih pơkra, pơhrua nao dong Anăn păn – Anăn pơkă jŭ yap mơng Tơlơi phiăn jŭ yap; rơwang bruă Tơlơi phiăn pơplih pơkra, pơhrua nao dong sa dua mơta tơlơi amăng Tơlơi phiăn dưi pô gah bôh thâo ia rơgơi; hơdră pơtrun pơplih pơkra Tơlơi phiăn Lŏn dron; hră čih Tơlơi pơtrun pơkă pơ ala nao Tơlơi pơtrun pơkă 101 thun 2005 mơng Kơnuk kơna gah pơdŏng, pơplih pơkra sang dô̆ kơ lu sang anô̆; pơtlaih tơlơi tơnap kơ pơkă dưm truă camera; pơsit bôh tơhnal pơdŏng hơdră pơkă, čih pơkra tơlơi phiăn 6 blan akô̆ thun hăng jơlan gah, bruă mă amăng hơdôm blan rơnuč thun.

Sa bôh yôm lăp đing nao amăng mông jơnum lĕ hră čih Tơlơi pơtrun pơsit mơng Kơnuk kơna kơ hră djru mơnuih mă bruă, mơnuih mă yua mơnuih mă bruă hăng hơdôm mơnuih bưp tơlơi tơnap yua klin Covid-19 hăng abih bang mrô prăk năng ai ñu 26.000 klai prăk. Gah bôh yôm anai, Khua dêh čar ta ơi Phạm Minh Chính rơkâo khom kơsem min, pel ĕp glăi kiăng pơhlôm hơdră bruă dưi pơsir abih hơdôm mơnuih kiăng gum djru, amăng anun pơhrua nao dong mơnuih kiăng gum djru lĕ mơnuih mă bruă hơdơ̆ pô kiăng./.

Siu H’ Prăk: Pô pơblang