VOV4.Jarai -  Ngă tui Tơlơi pơtrun pơsit mrô 19 mơng Kơnuk kơna jao kơ Khul Ping gah Khua pơ ala mơnuih ƀôn sang dêh čar ta črâo ba bruă pơplih pơkra, pơhrua nao dong Tơlơi phiăn lŏn drŏn thun 2003; hrom hăng anun pel ĕp, ngă giong hơdôm tơlơi phiăn hmâo bơdjơ̆ nao, pơjing gru than tơlơi phiăn kơ bruă ngă tui Tơlơi pơtrun pơsit hăng lăng tui bruă ngă tui amăng đơ đam dêh čar, čơtlăm tom brơi (19/8), Khua git gai wai lăng pơ ala mơnuih ƀôn sang dêh čar ta ơi Vương Đình Huệ hrom hăng grŭp mơnuih hyu mă bruă hmâo laih mông mă bruă hăng Ding jum kông ngăn dlai klô hăng rơhuông adai lŏn mơnai.

Klah čun amăng mông mă bruă, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi lĕ, Tơlơi phiăn lŏn mơnai lĕ sa tơlơi phiăn hmâo anô̆ gơgrong phun amăng glông bruă tơlơi phiăn gah lŏn drŏn, sa amăng hơdôm glông hră pơ-ar tơlơi phiăn hmâo tơhnal yôm phăn, bơdjơ̆ nao rơwang prong, tơnal tơnap hăng rơnoh tơnap prong. Khua git gai wai lăng pơ ala mơnuih ƀôn sang dêh čar ta lăi rơđah, kiăng kơsem min dong rơwang bơdjơ̆ nao mơng rơwang bruă tơlơi phiăn, lăng yôm bruă pơsit bơdjơ̆ nao rơđah rơđông, hơdôm tơlơi phrâo mơ̆ akă hmâo kơsem min lĕ khom kơđiăng. Hrom hăng anun, lom tŭ mă, pơblang ăt khom pơplih mơn, hmư̆ lăng lu bơnah, hrom hăng anun pơplih klă mơta tơlơi./.

Siu H’ Prăk: Pô pơblang