VOV4.Jarai - Tui hăng tơlơi lăi pơthâo tañ mơng Ding jum pơtô pơjuăt, hrơi pơplông tal 1, tal pơplông abih anih 12 thun 2021, mrô čơđai nao pơplông 2 tơlơi hrăm Ngữ Văn hăng Toán rơbêh 97% pơhmu hăng mrô čơđai čih anăn. Đơ đam dêh čar hơmâo 9 čô čơđai ngă soh tơlơi pơkă lơ̆m nao pơplông. Tui hăng tơlơi sem lăng blung a mơng ƀing čơđai, nai pơtô hăng mơnuih mơnam,pơplông tơlơi hrăm Ngữ Văn hăng Toán lêng kơ hơmâo amăng jơlan hơdră hrăm anih gưl tlâo, huăi tơnap đơi ôh. Hơdôm Khul pơphun pơplông hơmâo ngă klă hơdôm hơdră pơgang klin Covid-19 hăng pok pơhai hơdră prap lui yua anun hơmâo pơsir hĭ hmao tlôn hơdôm tơlơi gun, tơnap ƀu hmao thâo, pơhlôm brơi tal pơplông rơnuk rơnua, tơpă sit. Hrơi anai (8/7), tal pơplông rơnuč amăng tal 1 anai, tal pơplông abih anih 12 thun 2021, mơguah ƀing čơđai pơplông gah tơlơi hrăm Khoa học tự nhiên hăng Khoa học xã hội, yang hrơi tlam pơplông tơlơi hrăm Ngoại ngữ.

Siu Đoan: Pơblang