VOV4.Jarai-Tlam lơ 10/6, ƀơi sang bruă khua pơ ala mơnuih ƀôn sang dêh čar jơnum lăi pơthâo Hră pơtrun mơ̆ng Khul ruah khua dêh čar, pơthâo boh tơhnal ruah khua hăng anăn ƀing djơ̆ ngă pô pơ ala mơnuih ƀôn sang dêh čar tal XV.

Tui hăng anun, hơmâo 499 čô mơnuih djơ̆ anăn mơnuih ƀôn sang plĕ hră ruah ngă pô pơ ala mơnuih ƀôn sang dêh čar tal XV. Pơhiăp ƀơi mông jơnum hăng ƀing čih tơlơi pơhing phrâo, ơi Trần Thanh Mẫn-ding kơna ding jum kơđi čar, Kơ-iăng khua phun git gai pơ ala mơnuih ƀôn sang dêh čar, Kơ-iăng khua phun khul ruah khua dêh čar lăi, tal plĕ hră ruah khua pơphun mơak klă tŭ yua, mơnuih ƀôn sang ngă pô, bơkơnar, djơ̆ tơlơi phiăn, rơnuk rơnua, thâo pơkrem, jing hrơi mơak prong kơ abih bang mơnuih ƀôn sang, hơmâo rơbêh 99% mrô mơnuih nao plĕ hră ruah khua.

Ơi Bùi Văn Cường, Khua čih pioh bruă khua pơ ala mơnuih ƀôn sang dêh čar, Khua anom bruă khul ruah khua dêh čar brơi thâo, tal ruah khua anai, hơmâo ruah djop 500 čô mơnuih pơ ala. Samơ̆, lơ̆m ĕp glăi kơnuih djop pô djơ̆ anăn, khul ruah khua dêh čar jơnum lok 6 pơsit, ƀu pơsit brơi ôh sa čô khua, yua aka ƀu djop tơlơi gêh gal tui tơlơi pơkă lăp jing sa čô mơnuih pơ ala kơ mơnuih ƀôn sang, anun lĕ anih plĕ hră mrô 1 ƀơi tơring čar Bình Dương.

Nay Jek: Pơblang