VOV4.Jarai - Khua ding jum, Khua jơnum min djuai ania Hầu A Lềnh phrâo hơmâo mông mă bruă hăng Ping gah tơring čar, Jơnum min mơnuih ƀon sang tơring čar Yên Bái lơ̆m ngă tui hơdôm bruă djuai ania, bruă prap lui pok pơhai ngă tui jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam ƀơi kual mơnuih djuai ania ƀiă hăng kual ataih, asuek rơwang thun 2021-2030. Amăng mông mă bruă, Khua git gai Ping gah tơring čar Yên Bái - Đỗ Đức Duy čang rơmang, Jơnum djuai anai tŏ tui đing nao, djru brơi tơring čar Yên Bái ngă klă hơdôm hơdră djuai anai pơ anăp anai; anai lĕ hơdră bruă pơtrut gum djru, hơdră djru brơi mơnuih arăng đăo gơnong; wai pơgang glai rưng, pơđĭ kyar ngă hmua hăng bơwih brơi tuai čuă ngui …Khua ding jum, Khua jơnum min djop djuai ania Hầu A Lềnh rơkâo tơring čar Yên Bái kơtưn amăng bruă pôr pơhing, pơtrut pơsur djop anom bruă kơđi čar amăng bruă djuai ania, ngă tui hơdră djru mơnuih djuai ania ƀiă, ba glăi tơlơi tŭ ư hrŏm amăng mơnuih mơnam; pel ĕp, pơplih hơdră djuai ania brơi lăp djơ̆ pơ anăp anai; kơsem min git gai, đing nao pơsir khut khăt hơdôm bruă dŏ ngă tơnap tap ƀơi kual mơnuih djuai ania ƀiă.

Siu Đoan: Pơblang