VOV4.Jarai - Mơguah lơ 12/11, hơdôm bôh anom pơkra jơlan pơsir dong ƀơi anih lŏn tơhlom Jơlan mrô 27C, črăn găn anih čun čue Khánh Lê, gah tơring glông Khánh Vĩnh, tơring čar Khánh Hòa tơdơi kơ mă yua jơlan sa glông amăng mlăm 11/11. Yua kơ bơdjơ̆ nao mơng hơjan prong sui, Jơlan 27C, črăn găn anih čun čue Khánh Lê lŏn tơhlom ƀơi 4 anih anom.

Amăng anun, ƀơi Km41+300, črăn găn să Sơn Thái, tơring glông Khánh Vĩnh, tơring čar Khánh Hòa hmâo tơlơi lŏn tơhlom taluy dương trun ƀơi jơlan ngă gun ƀu thâo nao rai, mrô lŏn bôh pơtâo hmâo năng ai ñu 9000 m3. Anom wai lăng jơlan nao rai mrô 3.3, Anom wai lăng Jơlan glông III iâu pơhrui mơnuih gơgrong pơkra jơlan pơkra glăi tum pơƀut mơnuih mă bruă, măi mok kiăng pơkra glăi tañ hmâo jơlan nao rai. Hơdôm bôh ƀirô apăn bruă hmâo pơtă mơnuih ƀôn sang nao rai găn ƀơi anai tơdah kiăng biă mă kah nao, tơdah ƀu kiăng đơi tâ̆o hloh anăm găn nao ôh črăn jơlan anai. Ayuh hyiăng glăk ƀu gal ƀơi kual čun čue Khánh Lê, yua anun, ñu amra tơhlom trun lŏn, tơbor ƀu hmao thâo kah hăng bôh pơtâo lê̆ trun, phun kyâu rơbuh./.

Siu H’ Prăk: Pô pơblang