VOV4.Jarai -  Mơguah lơ 7/9, ƀơi Hà Nội, Ding jum đang hmua hăng pơđĭ kyar ƀôn lan dêh čar jơnum lăng nao rai mơng ataih hăng hơdôm bôh tơring čar, ƀôn prong hăng Khul gum hrom gơnong bruă gơnam tam črông sai jơlan pơtlaih tơnap kiăng djơ̆ tơhnal pơkă sĭ hnal kyâu kơ dêh čar tač rơngiao thun anai. Tal gluh đĭ klin Covid-19 tal 4 hmâo laih hăng glăk hmâo bơdjơ̆ nao prong truh bruă bơwih ƀong huă, pơkra hnal kyâu hơdôm bôh anom bơwih ƀong, biă ñu ƀơi kual Dơnung, anih hmâo rơbêh kơ 70% mrô anom bơwih ƀong, hăng nua sĭ gơnam kơ dêh čar tač rơngiao hmâo giăm truh kơ 80% mrô prăk pơhrui glăi mơng hnal kyâu sĭ kơ dêh čar tač rơngiao mơng đơ đam dêh čar. Yap him lăng hmâo laih rơbêh kơ ha mơkrah mrô anom bơwih ƀong khom pơdơi jăng jai ƀudah krư̆ bah amăng hăng hrŏ trun rơnoh pơkra hnal kyâu yua kơ klin ngă. Kiăng pơtlaih tơlơi tơnap kơ anom bơwih ƀong, gah Ding jum đang hmua hăng pơđĭ kyar ƀôn lan dêh čar hmâo ba tơbiă laih kơ Kơnuk kơna hăng Grŭp črâo bruă pơgang pơgăn klin Covid-19 dêh čar ta đing nao pơpha mrô vaccine pơgang Covid-19 kơ hơdôm bôh tơring čar, ƀôn prong anih anom bơwih ƀong mă bruă. Hrom hăng anun djru hăng pơtô brơi bruă ia jrao kiăng hơdôm bôh anom bơwih ƀong gơgrong hlâo blơi hăng pok pơhai mă ia adung pơčrang lăng tañ hăng pơčrang tui jơlan gah PCR djru hrŏ trun prăk mă yua; brơi hơdôm bôh anom bơwih ƀong gơgrong hlâo hơduah ĕp mrô vaccine pioh tlâ̆o pơgang kơ mơnuih mă bruă./.

Siu H’ Prăk: Pô pơblang