VOV4.Jarai-Mơguah lơ 6/12, ƀơi sang bruă khua git gai pơ ala mơnuih ƀôn sang dêh čar, Jơnum min mơnuih mơnam mơ̆ng anom bruă khua pơ ala mơnuih ƀôn sang dêh čar, jơnum abih bang lok 5 pioh pơtong glăi Hră lăi pơthâo mơ̆ng Kơnuk kơna kơ hơdôm tơlơi phiăn, jơlan hơdră yôm phara, jơlan hơdră pơhlôm, pơgang klin Covid 19. Kơ-iăng khua git gai pơ ala mơnuih ƀôn sang dêh čar ơi Trần Thanh Mẫn nao jơnum hrom.

Pơtong glăi hră lăi pơthâo mơ̆ng Kơnuk kơna, ƀing khua mua nao jơnum rơkâo lăi pơthâo rơđah hloh kơ bruă dăp mơnuih či mă bruă ngă hrom tlâ̆o pơgang, pơčrang kman, wai lăng hăng pơjrao mơnuih ƀă klin Covid 19. Ƀơi mông jơnum, Kơ-iăng Khua git gai pơ ala mơnuih ƀôn sang dêh čar ơi Trần Thanh Mẫn rơkâo brơi ngă rơđah hloh hnong pơkă glăi amăng Hră pơtrun jơnum anai, pơtum nao bruă pơkă hnong jơlan hơdră yôm phara, bruă mă ječ ameč djru pơhlôm, pơgang klin Covid 19 phara hăng tơlơi pơkă amăng tơlơi phiăn hlăk ngă tui ră anai.

Ăt ĕp glăi abih bang tơlơi pơtrun, jơlan hơdră, tơlơi pơkă amăng Hră pơtrun jơnum anai pioh lăi pơthâo hăng khua mua apăn bruă jơnum git gai pơ ala mơnuih ƀôn sang dêh čar.

Nay Jek: Pơblang