VOV4.Jarai-Khua ding jum Bruă đang hmua hăng Pơđĭ kyar plơi pla jơnum bơkơtuai mơ̆ng ataih lăng nao rai amăng tivi pioh pơthâo brơi bruă pla pơjing, ming pơkra gơnam sĭ mơdrô mơ̆ng đang hmua, gơnam OCOP kual Dap Kơdư thun 2021. Hơdôm anih pơphun jơnum kah hăng: Hà Nội, ƀôn prong HCM, 5 boh tơring čar amăng kual Dap Kơdư, kah hăng tơring čar Dak Lak, Dak Nông, Kon Tum, Gia Lai, Lâm Đồng.

Jơnum anai lĕ kiăng pơtruh nao rai bruă wai lăng kơnuk kơna, khua mua sang bruă sĭ mơdrô, mơnuih ƀôn sang ngă hmua djru lăi pơthâo pơsir hĭ tơlơi dŏ gun, amăng bruă wai lăng, pơkra pơjing hăng ba gơnam sĭ mơdrô amăng hrơi blan klin Covid 19 aka abih, đah mơ̆ng djru pok pơhai bruă jak iâu Mơnuih ƀôn sang gleng nao blơi yua gơnam Việt Nam ta pô pơkra ming”.

Ƀơi mông jơnum, pơphun kĭ pơkôl hră hơdor pioh, ngă hrom kơplah wah anom bruă sĭ mơdrô, pơkra ming gơnam sĭ mơdrô mơ̆ng boh troh đang hmua ƀơi 4 boh tơring čar Dak Lak, Dak Nông, Lâm Đồng, Gia Lai jing sa grup sĭ mơdrô pơđĭ anŏ tŭ yua rơnoh gơnam đang hmua, ba sĭ mơdrô amăng siêu thị, sĭ mơdrô raih daih pơ Hà Nội hăng ƀôn prong Hồ Chí Minh pioh blơi gơnam sĭ mơdrô.

Nay Jek: Pơblang