VOV4.Jarai-Yua bơbeč djơ̆ mơ̆ng klin kheng Covid 19, lu anom bruă mơdrô, sang anŏ pơkra ming gơnam sĭ mơdrô amăng tơring čar Dak Lak bong glăi hăng lu tơlơi lông lăng tơnap tap. Bruă pơkra ming gơnam sĭ mơdrô mơ̆ng lu boh kông ty, sang sĭ mơdrô anet prong kơđông hĭ, lup leč. Sang bruă prăk Đang hmua hăng Pơđĭ kyar plơi pla pơ Dak Lak (Agribank Dak Lak) sa amăng hơdôm boh sang bruă prăk hơmâo ngă tui hơdră pơhrơ̆i hnưh, pơtrun rơnoh prăk kơmlai djru kơ mơnuih čan prăk, sang sĭ mơdrô jing tuai čan prăk gơñu đah mơ̆ng plai ƀiă tơnap tap. Samơ̆ sang bruă prăk kơnuk kơna khom pơblih glăi tơlơi pơkă amăng hră thông tư mrô 03/2021 pioh kơ tuai čan prăk hơmâo tơlơi gêh găl rŭ glăi, pơđĭ kyar bruă pơkra ming sĭ mơdrô.

Sang anŏ yă Nguyễn Thị Phơn, dŏ pơ grup 3, tơring kual Ƀuôn Trấp, tơring glông Krông Ana hơmâo 3 ha lŏn pla tiu, kơphê, boh sầu riêng, hăng 13 ha lŏn ngă hmua pơdai. Hăng 13 ha lŏn hmua pơdai, hơdôm thun giăm anai yă Phơn kơnong rah pơdai sa bơyan, sa bơyan dŏ glăi pla hơbơi čên Japan. Hăng hơdră ngă djơh hăng anai, boh tŭ yua kơ bơwih ƀong huă đĭ hloh 2 wơ̆t pơkă hăng ñu ngă hmua pơdai dua bơyan kah hăng hlâo adih.

Djop anom bruă sĭ mơdrô anet hăng man ƀrô ƀơi Dak Lak hlăk bưp tơlơi tơnap amăng bruă pơkra ming sĭ mơdrô yua bơbeč mơ̆ng klin Covid 19

Ră anai, yă Phơn hlăk dong hnưh sang bruă prăk Đang hmua hăng Pơđĭ kyar plơi pla 2 klai prăk, rơnoh prăk anai tuh pơ alin blơi pơjeh hăng kmơ̆k hơbâo pruai kơ phun pla. Thun anai, rơnoh gơnam yua ngă hmua đĭ lu, hơbâo urê đĭ hloh dua wơ̆t pơkă hăng thun hlâo. Tui anun gơnam tam boh troh đang hmua lĕ trun nua hăng tơnap sĭ mơdrô. Yă Phơn brơi thâo: sang anŏ gơñu ăt hmư̆ mơ̆n sang bruă prăk lăi pơthâo pơtrun rơnoh kơmlai prăk čan lĕ 10% yua bơbeč djơ̆ klin Covid 19 ngă. Tui hăng yă Phơn, ngă hmua tui hơdră sĭ mơdrô ră anai hlăk tơnap tap biă mă.

“Apah mơnuih mă bruă ƀu dưi pơtum lu mơnuih. Ră anai, hmua đang sang anŏ ngă prong, ăt kiăng lu mơnuih mă bruă. Ƀơi anŏ apah mơnuih mă bruă mơ̆ng klâo hơpluh truh pă hơpluh čô mơnuih mă bruă mơtam. Yua klin tui anun, anun yơh tơnap tap ƀu thâo apah mơnuih mă bruă lu, ƀu thâo pơtum hŭi ƀă klin".

Hrơi blan rơgao amăng tơring glông Krông Ana, tơring čar Dak Lak arăng brơi dŏ pơčlah na nao tui hră pơčrâo 15. Lu sang anŏ sĭ mơdrô, anih anom mă bruă pơkra ming gơnam sĭ mơdrô pơdơi, mơnuih mă bruă ƀu hơmâo bruă mă. Lu sang anŏ jai tơnap yua hơmâo ană bă nao mă bruă apah pơ ataih, glăi hŭi mơ̆n ba glăi klin. Samơ̆ 60 čô mơnuih mă bruă amăng kông ty mơnuih ƀôn sang ngă pô pơkra ming hăng sĭ mơdrô Nam Hà, să Êa Bông, tơring glông Krông Ana ăt mă bruă đôč.

Hơdôm hơpluh rơbâo tuai čan prăk bơbeč yua klin Covid 19 ƀơi Dak Lak hlăk ĕp glăi djru pơtrun rơnoh prăk kơmlai čan

Ơi Trần Văn Thương, Khua kông ty brơi thâo: prăk blan apah kơ mơnuih mă bruă apah mơ̆ng 10-11 klăk prăk rĭm blan. Samơ̆ amăng blan 8 rơgao, yua kơ bruă mă pơdơi hĭ anun kông ty Nam Hà kơđông hĭ rơbêh 1 klăk 500 rơbâo tơlô̆ ƀrik ƀu thâo ba sĭ mơdrô. Tơnap tap, dong hnưh ƀuh ba mơtam yơh. Mah djă bong bruă mă hăng apah prăk blan djop kơ mơnuih mă bruă ră anai sa tơlơi pơmin gleh glar biă mă yơh.

“Kâo čan prăk mơ̆ng sang bruă prăk lu biă mă. Sang bruă prăk djru mơ̆n prăk kơmlai, pơhrŏ rơnoh kơmlai laih. Samơ̆ ră anai anom bruă tơnap tap biă mă pioh hyu ĕp anih sĭ mơdrô, sang bruă prăk dưi mơ̆n thơ sem lăng pơhrơ̆i dơ̆ng hrơi blan, ƀudah pơtrun dơ̆ng rơnoh prăk kơmlai kơ anom bruă sĭ mơdrô kiăng dưi djă bong bruă mă pơsir bruă mă kơ adơi ayong mơnuih mă bruă”.

Kông ty Tuh pơ alin sĭ mơdrô Thông Phát mơ̆ng rơkơi bơnai bơn Đinh Văn Kháng hơmâo sa boh sang jưh tuai pơ jơlan Hùng Vương, plơi prong Ƀuôn Ma Thuôt. Hlâo adih, tuai nao rai mut jưh. Samơ̆ hơdôm blan hăng anai, sang jưh tuai kơnong djă pioh ƀing mă bruă wai pơgang bah amăng sang jưh tuai đôč. Ơi Khang bơni biă mă bruă ngă mơ̆ng sang bruă prăk Ngă hmua hăng Pơđĭ kyar plơi pla să Hoà Thắng, anih ñu čan 6 klai prăk, djru kơ gơñu.

"Dơ̆ng mơ̆ng hơmâo klin hăng bruă mă sĭ mơdrô sang jưh tuai mrô tuai mơ̆ng tơring čar pơkŏn ƀiă laih, yua kơ anun sĭ mơdrô tơnap tap biă mă, hlong ƀu hơmâo tuai apah ôh. Gah sang bruă prăk hơmâo djru laih mơ̆n pơtrun prăk kơmlai. Gah sang bruă prăk lăi pơthâo kơ anom bruă sĭ mơdrô thâo gơñu pơhrŏ rơnoh prăk čan 10% mơ̆ng abih tih rơnoh prăk čan”.

Ơi Vương Hồng Lĩnh, Khua Sang bruă prăk Ngă hmua hăng Pơđĭ kyar plơi pla tơring čar Dak Lak brơi thâo: mông anai sang bruă prăk hơmâo pơkă đĭ trun prăk kơmlai kơ 50 rơbâo čô tuai čan prăk hăng abih tih 12 rơbâo 400 klai prăk, hrŏ 10% rơnoh prăk čan. Rơngiao kơ anun, sang bruă prăk dŏ pioh 30 rơbâo klai prăk čan, brơi sang bruă sĭ mơdrô anet hăng man ƀrô čan kơmlai 7% sa thun.

Ƀu kơnong kơ anom bruă sĭ mơdrô, sang anŏ mơnuih ƀôn sang čem rông hlô mơnong, ngă hmua ƀơi Dak Lak đôč ôh tơnap tap yua Covid 19 kiăng djru pơtrun prăk kơmlai mơ̆ng sang bruă prăk

Hrơi blan rơgao bruă ngă djru tơlơi hơdip mơda mơnuih ƀôn sang, sang bruă prăk anai pok pơhai klă biă mă, djru gong gai kơnuk kơna 5 klai 400 prăk, amăng anun djru sang ia jrao prong plơi prong Ƀuôn Ma Thuôt 1 boh rơdêh pơgiăng mơnuih ruă kraih, hăng hơdôm gơnam yua pơjrao duăm ruă rơnoh prăk 2 klai 950 klăk prăk. Pioh djru kơ ƀing tuai dưi čan prăk tơpă, ba glăi boh tơhnal tŭ yua, ơi Vương Hồng Lĩnh rơkâo:

“Amăng bruă pok pơhai jơlan hơdră djru kơ ƀing tuai čan prăk mơ̆ng Agribank Dak Lak hơmâo mơ̆n tơlơi gun, anun lĕ: pơtong glăi anŏ bơbeč djơ̆ klin Covid 19 ngă kơ ƀing tuai čan prăk anun kiăng hơmâo kơnôl pioh pơhlưh hĭ prăk kơmlai, djă hnong rơnoh prăk čan, tơlơi anun dŏ sư̆ rơbư̆ mơtam; ƀu hơmâo anŏ pơkă lăng tong ten ôh. Dua lĕ, hnưh dơ̆ng ƀu anăm tla kơ Agribank Dak Lak ăt lu, yua kơ tuai čan prăk bơbeč djơ̆ klin Covid 19 jai hrơi lu. Tơlơi rơkâo mơ̆ng Agribank Dak Lak lĕ:

Sang bruă prăk kơnuk kơna sem glăi pơhrơ̆i sui hrơi blan hloh kơ ƀing tuai čan prăk, pơsir brơi ƀing tuai čan prăk anun hơmâo hrơi mông ĕp prăk pioh tla glăi kơ sang bruă prăk, pơblih pơkra glăi hră pơtrun Thông thu mrô 3/2021 mơ̆ng sang bruă prăk kơnuk kơna sem glăi rơnoh prăk brơi čan tơdơi kơ lơ 10/6/2020 kơ ƀing tuai čan prăk, kiăng kơ hơmâo tơlơi gêh găl rŭ glăi sĭ mơdrô tŭ yua hloh”.

Lê Xuân Lãm-pô čih: Nay Jek pơblang