VOV4.Jarai - Mrô mơnuih tŭ mă bruă djru prăk kak ƀơi hơdôm kual plơi pla ala ƀon, kual ataih, asuek dŏ kơƀah biă mă. Anai lĕ bruă hơmâo lăi nao amăng jơnum “Pơtrut bruă prăk kak abih bang anăp nao pơđĭ kyar hơđong kjăp amăng ngă hmua, ƀon lan ƀơi Việt Nam” yua hră pơhing sang bruă prăk, Sang bruă prăk Kơnuk kơna pơphun. Truh rơnuč blan 10 thun anai, prăk čan djru pơđĭ kyar ngă hmua, ƀon lan dưm dưm giăm 2 klăk 500 rơbâo klai, đĭ 9,2% pơhmu hăng thun 2020, dưm dưm 25% hnưh đom amăng bruă bơwih ƀong huă. Samơ̆, hrŏm hăng hơdôm boh than dưi ngă, hơdră prăk kak abih bang anăp nao pơđĭ kyar hơđong kjăp amăng ngă hmua, ƀon lan ăt dŏ lu anŏ aka ƀu klă. Lăi nao kơ bruă tŭ mă mơng mơnuih ƀon sang bơkơnar hăng hơdôm rơnoh djru mơng sang bruă prăk lăi pơthâo, ră anai ăt dŏ phara prong kơplah wah plơi prong hăng kual ƀon lan, kơplah wah ƀôn prong hăng hơdôm tơring čar kual ataih, asuek. Ơi Nguyễn Kim Anh, Kơ-iăng Khua sang bruă prăk Kơnuk kơna brơi thâo hơdôm hơdră bruă anai kiăng kơ anăp nao pơsir hĭ hơdôm tơlơi anai.

Siu Đoan: Pơblang