VOV4.Jarai - Phrâo rơgâo hơmâo pơphun Jơnum lăng nao rai amăng tivi mơng Khua mua apăn bruă Kơnuk kơna hăng 27 boh tơring čar, ƀon prong kual Dơnung mơng Phú Yên truh pơ Cà Mau kơ bruă pơhlôm, pơgang klin Covid-19. Pơhiăp ƀơi mông jơnum, Khua dêh čar ơi Phạm Minh Chính kiăng pơtrut đĭ pran kơtang gum pơgôp abih bang djuai ania, abih bang anom bruă čar, mơnuih ƀon sang, anom bơwih ƀong sĭ mơdrô, abih bang gum djru, glăm ba bruă, gum hrŏm pơgang klin.

Ƀơi mông jơnum, ƀing khua hơmâo pơƀut pơtŏng glăi klin Covid-19 ră anai laih anun đao lăng hlâo tơlơi klin ngă amăng hrơi blan pơ anăp; tơlơi dưi ngă hăng tơlơi aka ƀu klă amăng bruă mă, biă ñu bruă git gai, pơphun ngă bruă, tơlơi gum djru nao rai kơplah wah anom bruă, tơring čar či pơgang klin klă hloh, kiăo tui tơlơi pơmin pơgang ba tơlơi suaih pral kơ mơnuih ƀon sang yơh yôm hloh; bruă kiăng ngă hlâo ƀơi hơdôm tơring tơrang ră anai lĕ pơhlôm, pơgang klin Covid-19, hơdôm anih dŏ rơnuk rơnua, ăt brơi ngă bruă pơkra gơnam, pơđĭ kyar bơwih ƀong huă. Lăi pơthâo glăi ƀơi mông Jơnum, Khua ding jum ia jrao ơi Nguyễn Thanh Long brơi thâo, klin kheng amăng dêh čar ta ră anai dŏ kơtang đôč:

“Ră anai ƀơi abih bang anih djuai kman Delta yơh lu, djuai kman anai ngă tơlơi truh kơtang biă ƀơi rŏng lŏn tơnah. Yua hơget ƀing ta ƀuh tal anai kman ñu ƀă kiăo tui ƀut mơnuih, ƀă bơrơkua nao rai, hơmâo lu mơnuih ƀă klin amăng ha hrơi mông. Yua dah kman amăng drơi ƀing ƀă kman tơbiă gah rơngiao tañ hloh, hrơi mông ñu ƀă hyu tañ hloh kơ hlâo adih. Ƀing gơmơi ăt pơhŭi hlâo hăng hơdôm boh tơring čar, ƀon prong pơgang klin ƀu djơ̆ tui mơng hlâo dong tah, khŏm pơgang hơdeč hmar hloh, kơtang hloh, hơđong pran jua hăng khut khăt hloh”.

Jơnum lăng nao rai alăng tivi mơng Khua apăn bruă Kơnuk kơna hăng 27 boh tơring čar, ƀon prong gah Dơnung.

Ƀơi anăp tơlơi klin kơtang tui anai, ƀon prong Hồ Chí Minh hơmâo pơkra mă hơdră pơgang laih, tui hăng Khua Jơnum min mơnuih ƀon sang ƀon prong ơi Nguyễn Thành Phong, ƀon prong prăp lui laih tơdah hơmâo 20 rơbâo čô mơnuih ƀă klin.

“Yua tơlơi glêh tơnap hơmâo mơnuih ƀă klin lu hlâo hrơi pơphun ngă tui Tơlơi pơčrâo trun mrô 16, ƀon prong hơmâo pơƀut pơkra ming hăng ba mă yua 5 ƀut sang ƀu hơmâo pô dŏ mơng kual pơdong plơi phrâo phường An Khánh, plơi prong Thủ Đức, hơmâo 24.000 boh sưng đih hăng anih pơdơi pran hăng anih anom phrâo, dưi djru ba măi suă pran lơ̆m ha wơ̆t kơ 1.000 čô mơnuih ruă, truh ră anai, ƀon prong prăp lui giong laih tơlơi truh tơdah hơmâo 20.000 čô mơnuih ƀă klin”.

Tơdơi kơ hmư̆ hơdôm tơlơi pơgôp hiăp mơng hơdôm tơring čar, ding jum, anom bruă tum pơƀut ƀơi mông jơnum, Khua dêh čar ơi Phạm Minh Chính bơni kơ hơdôm tơlơi dưi ngă mơng ƀon prong Hồ Chí Minh hăng hơdôm boh tơring čar hơmâo ngă amăng hrơi blan rơgao, hơmâo gir abih pran jua, yua tơlơi suaih pral, tơlơi djai hơdip mơng mơnuih ƀon sang. Khua dêh čar kiăng hơmâo hơdră pơgang kơtang hloh, khut khăt hloh, krăp lăng tơlơi truh rim hrơi, hơdeč hmar, tŭ yua hloh či bong glăi, pơgăn klin, lăng bruă pơgang ba, wai lăng tơlơi suaih pral kơ mơnuih ƀon sang yơh yôm hloh, ƀu brơi pô hlơi kơƀah asơi huă, kơƀah sum ao buh, kơƀah gơnam yua amăng mông anai; pơƀut pơjrao brơi mơnuih ƀă klin, gir kiăng plai ƀiă hơmâo mơnuih djai; wai lăng kơjăp tơlơi rơnuk rơnua mơnuih mơnam; wai lăng kơjăp guai lŏn ia, ƀu brơi hơmâo pô mut nao rai ča čot; pơgang ba anih pơkra gơnam - anih pơhlôm gơnam blơi sĭ. Kơ tơlơi git gai, Khua dêh čar ta lăi kiăng pơtrut hloh pran kơtang mơng abih bang djuai ania amăng bruă pơgang klin:

“Kiăo tui hăng tơlơi pơmin “Pơgang klin kar hăng pơkơdong ayăt”, ngă bruă tŭ yua hloh dong, pơplih mơng pơgang jing kơsung nao hlâo. Mă bruă pơgang klin yơh tơlơi phun, hơdră pơsir, sui thun hăng pơsit dưi hă ƀŭ. Iâu pơhrui abih bang pran kơtang thâo gum pơgôp mơng abih bang djuai ania, abih bang anom bruă čar, mơnuih ƀon sang, anom bơwih ƀong sĭ mơdrô, abih bang djru glăm ba bruă, gum hrŏm pơgang klin, ngă tui tơlơi pơtrun, tơlơi pơkôl pơkă hơmâo djŏp anom bruă pơtrun, pơtô ba. Pơtrut đĭ pran jua pơgang mă pô, thâo pơčeh phrâo, nao hlâo amăng bruă mă mơng djŏp ping gah, anom bruă, tơring čar. Hơmâo tơlơi truh phrâo khŏm hơmâo hơdră pơsir bruă phrâo mơn, kiăng kiăo tui tơlơi hơmâo ră anai, kơjăp bruă pơgang hlâo. Rim boh să, phương, sang măi, anom bruă kơnuk kơna khŏm jing puih kơđông pơgang klin, rim čô mơnuih lĕ sa čô tơhan kơsung nao hlâo ƀơi djŏp anih pơgang klin”.

Khua dêh čar ơi Phạm Minh Chính.

Rơngiao kơ anun, kiăng pơpŭ tơlơi dưi djơ̆ tơlơi phiăn mơng mơnuih ƀon sang, pơđĭ tui bruă djru brơi mơnuih ƀon sang. gum pơgang klin lĕ tơlơi kiăng ngă mơng mơnuih ƀon sang. Djŏp anom bruă, ping gah, gong gai khŏm pơdah pơƀuh rơđah anom bruă lĕ anih mơnuih ƀon sang gơnang; pơjing tơlơi tơnap, tơlơi lông jing tơlơi kiăng ƀing ta kơjăp bruă, thâo pơmin hloh, bơwih brơi mơnuih ƀon sang klă hloh. Jak iâu mơnuih ƀon sang gum djru, ngă pơhưč pran jua kiăng mơnuih ƀon sang ngă klă tơlơi pơtrun mơng Kơnuk kơna kơ bruă pơhlôm pơgang klin hăng pơkra gơnam, sĭ mơdrô. Kiăo tui tơlơi dưi ngă, pơtrut đĭ hơdră pơgang, boh than, tơlơi kơđiăng lui hlă, hmư̆ hing amăng bruă pơgang klin.

Hơdôm boh tơring čar hơmâo lu mơnuih ƀă klin kiăng pơƀut pơgăn, guang dar, tañ hơđong glăi tơlơi hơdip. Kiăo tui djŏp tơlơi hơmâo či pơtrut bơwih ƀong sĭ mơdrô; akŏ pơdong anom bruă gum djru, telephôn iâu ječ ameč, măi mok djru ba lăp djơ̆; kơsem min pơkra plang internet kiăng mơnuih ƀon sang lăi glăi djŏp tơlơi tơnap, tơlơi ngă gun lơ̆m gơñu kiăng, kiăng mơnuih ƀon sang hơđong pran jua gum pơgôp, djru ba bruă pơgang klin. Amăng hrơi mông ngă tui tơlơi pơtrun mrô 15, 16 lĕ khŏm ngă hơđong mơnuih ƀon sang, wai lăng tơlơi hơdip kơ mơnuih ƀon sang, anăm brơi mơnuih ƀon sang hil ruă hơget ôh. Hơdôm anom bruă pôr pơhing lăi pơthâo tañ tơlơi pơhing kiăng mơnuih ƀon sang gum pơgang klin klă hloh.

Khua dêh čar git gai djŏp gưl, anom bruă, plơi pla kiăng gir hloh dong, ngă bruă ƀơi lĕ giong hlao bruă anun, tañ pơgang abih klin, ba glăi tơlơi hơdip rơnuk rơnua kơ mơnuih ƀon sang, dưi ngă truh kih dua mơta bruă ha wơ̆t.

Siu H’Mai: Pơblang