VOV4.Jarai-Amăng tal jơnum khua mua pơ ala mơnuih ƀôn sang djop dêh čar AIPA 42, rơnuč či tlam lơ 23/8, pơphun Jơnum ƀing đah kơmơi ngă khua pơ ala mơnuih ƀôn sang dêh čar, pơčrông sai kơ bruă pơtrut jao tơlơi dưi bơwih ƀong huă kơ đah kơmơi kơñ pơgi rŭ glăi bơwih ƀong huă tơdơi abih klin prong hăng ngă bruă kơnang kơ hơdră mă yua boh thâo ia rơgơi hăng mrô laih anun prăk kăk pơtruh nao rai tar ƀar.

Ƀơi mông jơnum, Khua Jơnum min khul đah kơmơi ngă pô pơ ala AIPA lăi pơtong, tơlơi bơkơnar đah kơmơi hăng đah rơkơi, 30% mrô đah kơmơi ƀơi kual ASEAN hlăk bưp tơlơi tơnap tap laih anun lu kơ mă bruă sang anŏ đôč. Klin kheng prong anai ngă kơ đah kơmơi jai kraih ƀu hơmâo tơlơi dưi. Covid pơtrut ană mơnuih pơmin ngă bruă bơblih hăng mrô laih anun măi mok mă bruă hơjăn, tơlơi anai ngă tơnap kơ đah kơmơi lu hloh.

Yua kơ anun, pô pơ ala grup dêh čar Brunei, khua git gai khul AIPA 42 hơmâo tơlơi pơtrun hrom jơnum anai kiăng pơtrut jao tơlơi dưi kơ đah kơmơi ngă bruă bơwih ƀong huă lu hloh kơñ pơgi rŭ glăi tơlơi bơwih ƀong huă tơdơi kơ abih klin kheng laih anun pơsir bruă mă kơnang  hơdră mă yua mrô laih anun prăk kăk tar ƀar anih, kiăng pơhrŏ ƀiă anŏ pleh ploh bơkơnar rơkơi hăng bơnai.

Nay Jek: Pơblang