VOV4.Jarai-Ruah khua pơ ala mơnuih ƀôn sang dêh čar tal XV hăng ruah ƀing pơ ala mơnuih ƀôn sang djop gưl rơwang thun 2021-2026 lĕ, bruă mă kơđi čar yom biă mă mơ̆ng lŏn ia, jing mông gêh găl pioh kơ mơnuih ƀôn sang ngă tui tơlơi dưi mơ̆ng pô kiăng ruah mơnuih ngă pô pơ ala ƀơi anom bruă khua pơ ala mơnuih ƀôn sang dêh čar hăng pơ ala djop gưl.

Yua kơ anun, bruă git gai pơhing phrâo, pơtô pơblang kơ mơnuih ƀôn sang plĕ hră ruah khua pơ ala mơnuih ƀôn sang dêh čar tal XV hăng pơ ala mơnuih ƀôn sang djop gưl thun 2021-2026 khom pơphun mơ̆ng gơnong dlông trun pơ djop tơring čar, ngă tui hăng lu hơdră phara djru hrom pơsit boh tŭ yua kơ bruă ruah khua pơ ala mơnuih ƀôn sang plĕ hră ruah khua.

Hrom hăng anun, djop tơring čar plơi pla mơnuih ƀôn sang djuai ƀiă hlăk pơtrut kơtang bruă pơtô pơblang hăng lu hơdră phara, kiăng djru mơnuih ƀôn sang thâo hluh tong ten kơ bruă yom ruah khua laih anun tơlơi glăm ba mơ̆ng hră ta nao plĕ ruah. Mơ̆ng akŏ blan 3 thun 2021, Anom bruă djuai ania-Jơnum min djuai ania dêh čar hơmâo pơkra akŏ bruă anăn 1449 kơ pok pơhai bruă pôr tơlơi pơhing, pơtô pơblang kơ ruah khua pơ ala mơnuih ƀôn sang dêh čar tal XV hăng pơ ala mơnuih ƀôn sang djop gưl mơ̆ng thun 2021-2026 brơi kơ mơnuih ƀôn sang djuai ƀiă.

Tui hăng anun, boh yom phun pơtô pơblang pơtum kơ bruă kiăng ngă, tơlơi tŭ yua yom hăng boh yom pơphăn mơ̆ng plĕ hră ruah; pôr tơlơi pơhing tơlơi phiăn pơtrun pơdjơ̆ nao kah hăng Tơlơi phiăn phun Phiah phiăn 2013, Tơlơi phiăn ruah khua pơ ala mơnuih ƀôn sang dêh čar, tơlơi phiăn ruah khua pơ ala djop gưl ră anai; hơdôm pok hră pơtrun pơtô brơi bruă ruah khua mơ̆ng kơnuk kơna, hră pơtrun mơ̆ng Jơnum min apăn bruă git gai phun pơ ala mơnuih ƀôn sang hăng Khul git gai bruă ruah khua dêh čar.

Pơtô pơblang kơ tơlơi phiăn pơkă tong ten, akŏ tlôn hơdră plĕ hră ruah, tơhnal pơkă kơnuih lăp mơnuih ngă pô pơ ala gưl dêh čar hăng djop gưl, kơ tơlơi dưi plĕ hră ruah khua, tơlơi dưi tơbiă anăn mơ̆ng mơnuih ƀôn sang hăng tơlơi glăm ba mơ̆ng mơnuih plĕ hră lơ̆m nao plĕ hră ruah khua.

Pơtô pơblang tơlơi dong yua mơ̆ng mơnuih ƀôn sang, mơnuih djuai ƀiă hăng jơlan hơdră bơblih phrâo mơ̆ng Ping gah, bruă pơkơtưn mă bruă čơkă mơak ruah khua; pơpŭ bơni hmao kru hơdôm anom bruă hăng mơnuih hơmâo ngă bruă tŭ yua ba glăi boh tơhnal hiam klă lơ̆m ruah khua, boh nik ñu bruă ruah khua amăng kual lu mơnuih ƀôn sang djuai ƀiă dŏ hơdip mơda, pơ kual čư̆ siăng, kual guai dêh čar, biă mă ñu kual tơnap tap hloh.

Pơtô pơblang kơ bruă mă bưp mơnuih plĕ hră, ră ruai tơlơi hơdip, bruă mă hăng hơdră či mă bruă mơ̆ng mơnuih tơbiă anăn ruah khua, boh nik ñu mơnuih djuai ƀiă, mơnuih tơbiă anăn pơ kual mơnuih djuai ƀiă, mơnuih djuai ƀiă tơbiă anăn pioh ruah, mơnuih tơbiă anăn mơ̆ng kual tơnap tap hloh.

Pơtô pơblang kơ bruă mă bơwih bơwăng, pơhlôm brơi bruă ruah khua kiăng tŭ yua hăng pơtô lăi kơ boh tơhnal ruah khua, ngă hrom hăng bruă pơhlôm, pơgang klin Covid 19.

Ră anai, djop tơring čar plơi pla kual ataih hur har pơtô pơblang kơ bruă ruah khua truh pơ djop plơi pla, djru mơnuih ƀôn sang djuai ƀiă thâo hluh tong ten tơlơi dưi, bruă ngă mơ̆ng gơñu amăng bruă ruah khua pơ anăp.

 Khua mua djop gưl ping gah, mơnuih ngă bruă pơtô mơnuih ƀôn sang, ngă hrom ƀing khua mua mơnuih djuai ƀiă, thâo pơhiăp djuai ania ƀiă, hơmâo tơlơi thâo amăng bruă pơtô lăi jak iâu mơnuih ƀôn sang. Ƀing tơhan kông să, tơhan pơgang guai dêh čar, tơdăm dra hlăk ai, khul đah kơmơi mut phung  ăt dưi jak iâu ngă hrom pơtô pơblang. Yă Nguyễn Thị Hồng Vân, Kơ-iăng khua jơnum min djop djuai ania mơnuih mơnam Việt Nam, tơring čar Lạng Sơn brơi thâo:

“Ƀing gơmơi hơmâo pơkra hơdră pơtrut bruă mă pơtô pơblang kơ ruah khua hăng hơdră pơtô pơblang khom djơ̆ găl hăng tơlơi gêh gal kiăng tŭ yua. Amăng anun, gleng nao hloh mơnuih ƀôn sang djuai ƀiă tơnap tap dŏ giăm guai dêh čar…

Mơ̆ng anun, tơlơi tơlơi bang hyu mơ̆ng ñu, pioh kơ mơnuih ruah khua pơ ala mơnuih ƀôn sang dêh čar hăng ƀing pơ ala djop gưl rơwang bruă thun 2021-2026 jing hrơi mơak prong kơ abih bang mơnuih ƀôn sang”.

Kiăng ngă gêh gal hăng gru grua thâo thăi djop djuai ania, bruă pơtô pơblang kơ mơnuih ƀôn sang khom ngă tui hăng lu hơdră pơtô pơčrâo ƀuh ƀơi anăp mơta, iâu pơthưr, mă yua lu hơdră tơlơi pôr pơthâo hăng gơnam yua tơlơi pơhing hmar, mă yua djơ̆ tơlơi gêh găl, kơnuih mơnuih arăng đăo kơnang, pơphun adoh suang hyu pơdah djop anih hăng pơtô pơblang rah bruă ruah khua, pôr pơthâo hăng tơlơi pơhiăp djuai ƀiă, pơpha hră anet čih pơblang kơ bruă ruah khua kiăng amuñ thâo hluh....

Yă Phạm Thị Lan, Kơ-iăng Khua jơnum min djop djuai ania mơnuih mơnam Gia Lai lăi pơtong, boh tŭ yua mơ̆ng khul ngă bruă hyu pơtô pơblang pơhiăp pôr ƀơi anăp mơtam, kual ataih, kual asuek:

“Biă mă ñu mơnuih arăng đăo kơnang, ƀing tha plơi, khua ƀôn mă yua tơlơi pơhiăp gơñu, kah hăng tơlơi pơhiăp djuai ania Jrai hăng Bahnar pơtô lăi kơ mơnuih ƀôn sang thâo kơ bruă ruah khua. Yua mơ̆ng hơdră tơlơi pơhing anun, lu mơnuih djuai ƀiă ăt thâo hluh laih, mă yua hla hră plĕ ruah mơ̆ng gơñu či ruah ƀing hơmâo djop tơlơi hơdip hiam tơpă, thâo rơgơi, ngă hrom amăng jơnum min pơ ala mơnuih ƀôn sang djop gưl”.

Ta dưi lăi, hăng bruă pơtrut pôr pơthâo tơlơi pơhing ruah khua ngă tui lu mơta bruă, bruă pơtô pơblang kơ mơnuih ƀôn sang pơ kual ataih, kual tơnap tap thâo krăn tơlơi pơhing hăng gah lui tơlơi pơtô pơčut pơčao soh glăi, pơčeh mă ča mơ̆ng ƀing ayăt roh; djru mơnuih djuai ƀiă thâo hluh:

Nao plĕ hră ruah khua lĕ djru hrom ruah mơnuih thâo bruă, mơnuih pơ ala kơ mơnuih ƀôn sang kiăng pơkra hơdră pơđĭ kyar kơ lŏn ia…djru tơlơi hơdip mơda gơñu dưi pơklaih mơ̆ng ƀun rin tơnap tap, hơđong na nao. Mơ̆ng anun, mơnuih ƀôn sang djuai ƀiă thâo hluh tong ten hloh kơ tơlơi gơgrong ba, bruă ngă mơ̆ng pô laih anun amra ngă hrom Hrơi plĕ hră ruah khua mơak hrom abih bang.

Nay Jek: Pơblang