VOV4.Jarai-Ƀơi Hà Nội, Jơnum min djop djuai ania mơnuih mơnam Việt Nam, anih ngă hrom pơplông 5 boh ƀôn prong gah dêh čar, jơnum pơƀut bruă mă pơplông amăng ƀut thun 2021. Đĭ pơhiăp ƀơi mông jơnum, Ding kơna apăn bruă git gai ping gah dêh čar, Khua Jơnum min djop djuai ania mơnuih mơnam Việt Nam, ơi Đỗ Văn Chiến rơkâo anom bruă wai lăng djop djuai ania mơnuih mơnam djop gưl, prăp lui klă, tong ten djru ba kiăng mơnuih mơnam bơbeč yua klin Covid 19 ngă dưi čơkă thun phrâo djuai ania mơak mơai, thun Nhâm Dần jing “Tết kơ pran jua khăp pap”.

Ơi Đỗ Văn Chiến rơkâo ƀut pơplông 5 boh ƀôn prong gah dêh čar kiăng pơkra hơdră tañ, pơphun mơak čơkă thun phrâo djuai ania Tết Nhâm Dần thun 2022, djru ba sang anŏ mơnuih hơmâo anăn kơnuk kơna djru, tơhan rơka rơkač, ƀing ruă nuă ngă tơhan, sang anŏ mơnuih djai pơsăn drơi jăn kơ lŏn ia, biă mă ƀing bơbeč yua klin Covid 19 ngă.

Ơi Đỗ Văn Chiến ăt rơkâo pơblih phrâo bruă mă, hơdră djru laih anun bruă ĕp lăng tŭ yua, pơđign hmư̆ tơlơi drơ̆ng glăi mơ̆ng mơnuih mơnam; đing nao hơdră sem lăng, kiăo tui mă hiăp pơgôp mơ̆ng mơnuih ƀôn sang hăng hơdôm tơlơi hlăk hơmâo, tơlơi rung răng, pơdjơ̆ nao tơlơi dưi, boh tŭ yua găl kơđi, lăp djơ̆ mơ̆ng mơnuih ƀôn sang.

Nay Jek: Pơblang