VOV4.Jarai - Dŏ kơnong giăm ha blan dong amra pơphun jơnum lok blung Khua pơ ala mơnuih ƀon sang dêh čar 15. Ƀu djơ̆ kơnong ruah glăi mơnuih apăn bruă, tal jơnum anai ăt sem lăng sa, dua boh tơhnal yôm phun pơkŏn. Yua anun, Khua pơ ala mơnuih ƀon sang dêh čar ơi Vương Đình Huệ rơkâo kiăng tŏ tui pơplih amăng jơnum lok blung a mơng Khua pơ ala mơnuih ƀon sang dêh čar tal 15 anăp naobruă hrŏ trun mông pơđok hră lăi thâo, lu tui mông pơđok hră lăi pơthâo pơsit lăp djơ̆, kiăng Khua pơ ala mơnuih ƀon sang dêh čar hơmâo mông sem lăng hăng pơgôp hiăp.

Him lăng, jơnum lok blung a, Khua pơ ala mơnuih ƀon sang dêh čar tal 15 amra pơphun amăng 11 hrơi ha mơkrah. Amăng anun, Khua pơ ala mơnuih ƀon sang dêh čar pioh 5 hrơi ruah mơnuih apăn bruă, pioh 4 hrơi ha mơkrah kiăng sem lăng hră lăi pơthâo hăng sa, dua boh tơhnal pơkŏn dong laih dong pioh ha hrơi kơ bruă prap lui; bơ hrơi mông dŏ glăi pơphun, pơđut mông jơnum hăng ha hrơi prap lui hŭi hơmâo bruă hơget dong.

Amăng mông jơnum, ƀing ding kơna Jơnum apăn bruă Khua pơ ala mơnuih ƀon sang dêh čar  tŭ ư hăng bruă pơphun jơnum lok blung a, Khua pơ ala mơnuih ƀon sang dêh čar tal 15 amăng lơ 20/7 pơ anăp anai, tui hăng tơlơi pơkă hơmâo pơjing brơi hrơi mông jơnum ruah mơnuih apăn bruă hlâo laih anun pơčrông sai hơdôm bruă pơkŏn dong. Yua anai lĕ lok jơnum blung a hăng pioh lu mông dưm dăp, ruah mơnuih apăn bruă, jơnum lăng nao rai amăng tivi. Amăng anun hơmâo giăm 500 čô khua mua hăng ƀing mơnuih apăn bruă djru brơi jơnum Khua pơ ala mơnuih ƀon sang dêh čar, laih dong lu ƀing mă tơlơi pơhing phrâo. Yua anun, ƀing ding kơna Jơnum min rơkâo: kiăng kơ prap lui bruă pơgang klin Covid-19 tong ten. Amăng anun, bruă tlâ̆o vaccine pơgang klin Covid-19 kiăng tañ ƀiă brơi ƀing khua mua hăng ƀing mơnuih djru bruă ... pơčrang lăng ƀiă biă mă ñu 2 wŏt hlâo kơ mut nao jơnum. Hrŏm hăng anun, pơhŭi hlâo ƀing khua mua anăm bưp hlơi pơkŏn tơdơi kơ mông jơnum, tơdơi kơ tlâ̆o vaccine giong ăt amuñ ƀă klin mơn. Yua anun, kiăng kơđiăng amăng hrơi mông nao jơnum lok blung a Khua pơ ala mơnuih ƀon sang dêh čar tal XV anai. Kơ hrơi mông jơnum lok blung a anai, Khua pơ ala mơnuih ƀon sang dêh čar ta XV, Khua git gai pơ ala mơnuih ƀon sang dêh čar ơi Vương Đình Huệ hơmâo ba tơbiă sa, dua tơlơi:

Abih bang hrơi mông kiăng sem lăng glăi kiăng kơ pơsit. Amăng jơnum lok blung a, Khua pơ ala mơnuih ƀon sang dêh čar tal XIV, 10 hrơi kơnong djop mông ruah mơnuih apăn bruă laih dong hră lăi pơthâo bruă bơwih ƀong huă mơnuih mơnam, ngăn drăp 6 blan, lĕ abih laih. Bơ amăng lok jơnum anai ƀing ta hơmâo lu bơh tơhnal yôm phun pơkŏn dong, yua anun ƀing ta kiăng prap lui tong ten, jơnum tal anai hơmâo wŏt akŏ bruă 5 thun pơ anăp dong, hơmâo wŏt akŏ bruă pơđĭ kyar bơwih ƀong huă mơnuih mơnam 5 thun, sem lăng bruă 5 thun pơ anăp, hăng mơ-it đĭ kiăng Khua pơ ala mơnuih ƀon sang dêh čar sem lăng pơsit akŏ bruă pơđĭ kyar 5 thun rơwang thun 2021-2025, hăng akŏ bruă ngăn drăp 5 thun. Lăng glăi tong ten, anăm brơi bruă tal hlâo pơkua nao tal pơ anăp anai.

Khua git gai pơ ala mơnuih ƀon sang dêh čar ơi Vương Đình Huệ ăt rơkâo kiăng tŏ tui pơplih phrâo amăng jơnum lok blung a anai Khua pơ ala mơnuih ƀon sang dêh čar tal XV anăp nao kiăng plai ƀiă mông pơđok hră lăi pơthâo, lu dong mông pơđok hră lăi pơthâo hơduah ĕp lăp djơ̆, kiăng kơ Khua pơ ala mơnuih ƀon sang dêh čar hơmâo mông sem lăng hăng pơgôp hiăp. Kơ boh tơhnal amăng jơnum anai, hrŏm hăng bruă ruah mơnuih apăn bruă, tal jơnum Khua pơ ala mơnuih ƀon sang dêh čar anai amra sem lăng hơdôm tơlơi lăi pơthâo boh than ngă tui akŏ bruă pơđĭ kyar bơwih ƀong huă mơnuih mơnam, ngăn drăp Kơnuk kơna 6 blan akŏ thun hăng hơdôm hơdră ngă tui akŏ bruă pơđĭ kyar bơwih ƀong huă - mơnuih mơnam, ngăn drăp kơnuk kơna 6 blan rơnuč thun 2021; tŭ yap bruă mă yua ngăn drăp Kơnuk kơna thun 2019; sem lăng, tŭ yap hơdôm tơlơi pơsit mơng Khua pơ ala mơnuih ƀon sang dêh čar kơ jơlan hơdră pơjing tơlơi phiăn, tơlơi pơsit thun 2022, akŏ bruă mă yua lŏn mơnai dêh čar rơwang thun 2021-2030 hăng akŏ bruă mă yua lŏn mơnai dêh čar rơwang thun 2021-2025.

Khua git gai pơ ala mơnuih ƀon sang dêh čar ta ơi Vương Đình Huệ git gai bruă prap lui jơnum lok blung a Khua pơ ala mơnuih ƀon sang dêh čar tal 15

Amăng mông jơnum lok 57, Jơnum min apăn bruă Khua pơ ala mơnuih ƀon sang dêh čar phrâo rơgao, ƀing ding kơna ăt pơgôp hiăp him lăng jơlan hơdră krăo lăng mơng Khua pơ ala mơnuih ƀon sang dêh čar, jơnum min apăn bruă Khua pơ ala mơnuih ƀon sang dêh čar thun 2022. Tui anun, ƀing ding kơna Jơnum min apăn bruă Khua pơ ala mơnuih ƀon sang dêh čar  tŭ ư jơlan hơdră krăo lăng mơng Ƀirô Khua pơ ala mơnuih ƀon sang dêh čar  hăng mơng Jơnum min apăn bruă Khua pơ ala mơnuih ƀon sang dêh čar thun 2022 yua Khua čih pioh Ƀirô Khua pơ ala mơnuih ƀon sang dêh čar  ba tơbiă hăng brơi thâo anai lĕ akŏ bruă lăp djơ̆, jê̆ giăm hăng tơlơi pơkă amăng bruă krăo lăng, tơlơi pơkă djru brơi bruă krăo lăng hăng hơdôm bruă glăk ngă tơnap tap ră anai hơmâo khua mua, mơnuih ƀon sang đing nao. Ƀing ding kơna Jơnum min apăn bruă Khua pơ ala mơnuih ƀon sang dêh čar  tŭ ư ruah 4 amăng 6 akŏ bruă krăo lăng mơ-it Jơnum min apăn bruă Khua pơ ala mơnuih ƀon sang dêh čar . Đĭ pơhiăp amăng mông jơnum, kơ-iăng khua git gai pơ ala mơnuih ƀon sang dêh čar ơi Đỗ Bá Tỵ lăi pơtong:

Hrŏm hăng bruă krăo lăng hrŏm mơng Ƀiro Khua pơ ala mơnuih ƀon sang dêh čar, rơkâo Jơnum min pơ ala djop djuai ania hăng djop jơnum min kiăng pok pơhai bruă lăi pơthâo, hơdôm boh tơhnal amăng bruă ngă tơnap tap ră anai kiăng kơ ngă rơđah mơnuih glăm ba mơng hơdôm khul grup, mơnuih apăn bruă, kơsem min kiăng kơ pơphun jơnum lăi pơthâo rơđah, tŏ tui pơphun grup hyu pel ĕp gum hrŏm hăng bruă krăo lăng, kơtưn klă dong amăng bruă tơña hăng lăi glăi mơng Jơnum min apăn bruă Khua pơ ala mơnuih ƀon sang dêh čar.

Yua mơng anai truh hrơi pơphun jơnum dŏ ƀiă laih, amăng anun dŏ lu bruă kiăng kơ pok pơhai ngă, yua anun, Khua pơ ala mơnuih ƀon sang dêh čar rơkâo djop anom bruă bơdjơ̆ nao gơgrong amăng bruă gum hrŏm pel ĕp, gir run prap lui hơdôm boh tơhnal bơdjơ̆ nao ƀing mơnuih glăm ba, pơhlôm klă hloh, tañ mơ-it hră pơ-ar nao Khua pơ ala mơnuih ƀon sang dêh čar . Tui hăng Khua git gai pơ ala mơnuih ƀon sang dêh čar ta ơi Vương Đình Huệ, tơdơi kơ mông jơnum lok 57, Jơnum min apăn bruă Khua pơ ala mơnuih ƀon sang dêh čar amra pơphun jơnum sa lok dong kiăng sem lăng hơdôm boh tơhnal dŏ glăi hlâo kơ mơ-it Khua pơ ala mơnuih ƀon sang dêh čar amăng jơnum tal blung a, amăng anun hơmâo hơdôm boh tơhnal yôm phun bơdjơ̆ nao akŏ bruă pơđĭ kyar bơwih ƀong huă - mơnuih mơna, akŏ bruă ngăn drăp prăk kak, akŏ bruă tuh pơ alin bruă čar gap ƀrô 5 thun … Khua git gai pơ ala mơnuih ƀon sang dêh čar rơkâo Kơnuk kơna tañ mơ-it hră pơ-ar sit nik hăng hơdôm boh tơhnal bơdjơ̆ nao Khua pơ ala mơnuih ƀon sang dêh čar kiăng kơ sem lăng.

Siu Đoan: Pơblang