VOV4.Jarai-Tui hăng tơlơi him lăng mơ̆ng Ding jum Pơtô hăng Pơjuâ̆t, tal pơplông abih anih 12 thun 2021 pơphun mơ̆ng lơ 7 truh lơ 9/7 pơ anăp.  Tal pơplông abih anih 12 thun 2021 anai pơphun lơ̆m klin Covid 19 ăt dŏ tơnap tap anun abih bang bruă mă prăp lui khom pơhlôm pơgang tong ten klin kheng.

Ƀơi kual Dap Kơdư, hrơi blan rơgao, anom bruă pơtô pơjuăt djop tơrign čar hơmâo pơtrut tañ bruă ngă pơtô hrăm tong ten čơđai sang hră anih 12, pơphun hrăm glăi brơi kjăp djơ̆ lăp, tŭ yua hlâo kơ pơplông.

Ƀơi anăp kơ tơlơi pơhing klin kheng tơnap tap Covid 19 ngă rai, anom bruă pơtô pơjuâ̆t tơring čar Dak Lak hlăk pok pơhai lu hơdră pơhrăm glăi, djru čơđai sang hră hrăm anih 12 prăp lui klă tal pơplông abih anih 12, pơsit giong hrăm gưl klâo. Thun anai, Dak Lak hơmâo 19 rơbâo 800 čô čơđai pơplông čih anăn. Amăng anun, hơmâo rơbêh 4.700 čô čih anăn tŭ yap hrăm giong anih 12, 14 rơbâo 400 čô pơplông giong, brơi ĕp lăng puang kiăng đĭ hrăm bruă, hrăm gưl prong.

Ƀơi anăp kơ tơlơi pơhing klin Covid 19 ƀă hyu kơtang, lơ̆m tơring čar Dak Lak hơmâo laih hơdôm čô mơnuih ƀă kman Covid 19, anom bruă Pơtô hăng pơjuâ̆t Dak Lak hơmâo pơphun lu hơdră hrăm glăi laih anun pơphun pơplông djơ̆ lăp tui hluai tơlơi pơhing anih pơplông.

Dak Lak pơphun hrăm glăi kơ čơđai sang hră

Hăng ƀing čơđai sang hră anih 12, Gơnong bruă pơtô hăng pơjuâ̆t hơmâo git gai tui hluai akŏ bruă pơkra hơdră, pơtum mơnuih mă bruă pioh pơtô hrăm glăi kơ čơđai anih 12. Amăng anun, djop sang hră pơpha bruă mă, mơnuih git gai tui hluai tơlơi pơtô, tơlơi thâo mơ̆ng rĭm bruă ƀudah tui hluai anih; pơtrut pran jua, apah bơni hmao kru hăng khua mua, mơnuih mă bruă, grup mă bruă ngă klă; pơtă pơtăn glăi, jăm ƀuah mơtam pô hlơi, grup pơpă, mă bruă ƀu glăm ba, ƀu tong ten amăng bruă ngă tui akŏ bruă pơtô hrăm glăi.

Mah bơbeč djơ̆ klin Covid 19, samơ̆ ƀing čơđai sang hră anih 12 amăng tơring čar ăt nao hrăm hră djop, ngă hrom hơdră pơhlôm pơgang klin rah, hrăm rah hră, Dak Lak hơmâo prăp lui hơdră tong ten amăng mông hrăm glăi, yua pơgang rah klin ƀu dưi pơtum lu mơnuih, samơ̆ čơđai dŏ amăng anih hrăm ăt khom gôm ƀô̆. Ơi Phạm Đăng Khoa, Khua Gơnong bruă Pơtô hăng Pơjuâ̆t tơring čar Dak Lak lăi:

“Ƀing gơmơi hơmâo git gai khut khăt djop sang hră amăng bruă mă , pơtô hrăm glăi, laih dơ̆ng lăi pơthâo hăng tơring čar kơ bruă akŏ pơjing khul grup git gai mơ̆ng tơring čar, pok pơhai akŏ bruă pơphun pơplông, ĕp glăi hơdôm tơlơi gêh găl pioh pơphun pơplông kiăng rơnuk rơnua hơđong, tơpă, djơ̆ tơlơi phiăn, hơmâo boh tơhnal pơplông abih anih 12 thun hrăm anai hloh kơ thun hrăm 2019-2020”.

Phrâo anai, Jơnum min mơnuih ƀôn sang tơring čar Lâm Đồng hơmâo hră pơtrun tŭ ư brơi djop sang hră gưl klâo, čơđai sang hră gưl klâo, čơđai sang hră gưl prong amăng tơring čar ngă hrom pơplông abih anih 12 bơyan tal 2 lĕ khom ngă giong lơ 21/5. Pơđut tal pơplông anai, ƀing čơđai sang hră pơdơi yua kơ hŭi klin hơđuh rai. Kơnong čơđai sang hră anih 12, Jơnum min mơnuih ƀôn sang Lâm Đồng pơtrun hiăp kơ Gơnong bruă Pơtô hăng pơjuâ̆t tơring čar pơtô brơi hơdră hrăm glăi či pơplông abih anih 12, hrăm mơ̆ng ataih, lăng nao rai amăng tivi.

Hơdôm anih tơnap tap hloh, kual mơnuih djuai ƀiă dŏ, ƀu hơmâo tơlơi gêh găl hrăm mơ̆ng ataih, pơphun brơi nao pơ anih hrăm pơtum samơ̆ dŏ ataih, hăng pơgang hơdjă, pruih ia jrao pơdjai kman amăng anih hrăm, gơnam yua hlâo kơ mut hrăm hră. Amăng hrơi blan ƀing čơđai nao sang hră, ƀu pơtum rơbêh 30 čô mơnuih ôh sa boh anih laih anun gôm ƀô̆ soh dŏ amăng anih hrăm, abih bang khom pơhaih tong ten bruă ia jrao, ngă djơ̆ hơdră pơhlôm, pơgang klin.

Ƀơi mông jơnum khua mua mơ̆ng dêh čar git gai bruă pơplông abih anih 12 thun 2021 phrâo anai, Kơ-iăng Khua ding jum Pơtô hăng pơjuâ̆t, ơi Nguyễn Hữu Độ, Khua git gai hơdôm čô khua mua amăng khul ĕp lăng bruă mă ngă hrom anom bruă ia jrao tong ten. Anai lĕ tơlơi pơtrun yôm, yua kơ tal pơplông thun anai  djơ̆ hrơi blan amăng bơyan hơmâo klin Covid 19 kơtang anun yơh djop bruă mă pơphun tơlơi pơplông khom ngă djơ̆ anŏ pơhlôm, pơgang klin.

Tui hăng tơlơi pơhing mơ̆ng ơi Nguyễn Đức Cường, Khua anom pel ĕp bruă mơ̆ng Ding jum Pơtô hăng Pơjuâ̆t, tal pơplông thun anai, ăt hơđong mơ̆n, ngă tui hơdôm hră hơmâo pơtrun hlâo laih anun hơmâo anŏ bơblih gêh găl tui hluai tơlơi pơhing klin. Tui hăng anun, lăng tui tal pơplông thun 2020, bruă mă pel ĕp, sem lăng abih bang djop črăn bruă pơplông thun 2021 dưi ngă tui mơ̆ng gơnong dlông truh pơ djop tơring čar.

Hăng djop tơring čar lĕ mrô mơnuih čơđai sang hră pơplông lu, khom ĕp lăng tong ten kơ bruă prăp lui hlâo. Ơi Nguyễn Đức Cường, Khua anom bruă Pel ĕp bruă mă mơ̆ng Ding jum Pơtô hăng Pơjuâ̆t brơi thâo:

“Kơ bruă čom puang tal pơplông anai bơblih hiư̆m ñu mơ̆ng djơ̆, tui hăng tơlơi pơtrun Tơlơi phiăn Pel ĕp thun anai bruă pel ĕp čom puang abih hrơi mông dŏ čom puang lĕ ăt pơphun ĕp lăng mơ̆n pơ djop anih khul nai dŏ čom puang. 63 grup hyu ĕp lăng mơ̆ng Ding jum ƀơi 63 boh anih pơphun pơplông abih hrơi mông čom puang khom ĕp lăng kiăng djơ̆ tơpă. Hơdôm grup nao ĕp anai, gơmơi jak iâu nai pơtô, khua mua mơ̆ng Ding jum hăng nai pơtô djop sang hră gưl prong”.

Tui hăng tơlơi jŭ yap mơ̆ng Ding jum Pơtô hăng Pơjuâ̆t, truh ră anai hơmâo rơbêh 1 klăk čô čơđai sang hră čih anăn pơplông abih anih 12 thun 2021, amăng anun rơbêh 41 rơbâo čô mơnuih pơplông rơngai.

Amăng mrô 1  klăk čô čơđai sang hră čih anăn pơplông amăng thun anai, hơmâo 222 rơbâo čô rơkâo pơplông abih anih 12 đôč, rơbêh 33 rơbâo čô rơkâo hrăm đĭ pơ gưl prong. Mrô čơđai kiăng mă ƀăng anih 12 hăng rơkâo mut hrăm gưl prong lĕ rơbêh 758 rơbâo čô, dưm dưm 74%. Mrô čơđai ruah mă pơplông tơlơi hrăm gah khoa học xã hội ăt lu hloh rơbêh 541 čô čơđai.

Nay Jek: Pơblang