VOV4.Jarai - Kơ-iăng khua dêh čar ta ơi Trương Hoà Bình phrâo anai git gai pơđut mông jơnum Khul git gai kơ Jơlan hơdră tui hơnong pơkă dêh čar amăng pơđĭ kyar bơwih ƀong huă - mơnuih mơnam kual mơnuih djuai ania ƀiă hăng kual atai, asuek rơwang thun 2021-2030. Kơ-iăng khua dêh čar jao Jơnum min djuai ania, Ding jum kơčăo bruă hăng tuh pơ alin hăng djop ding jum, gơnong bruă, gong gai ƀon lan gơgrong gum hrŏm klă, gir run ngă pơgiong hơdôm bruă jao hăng pơhlôm djơ̆ hrơi mông, prap lui pok pơhai ngă tui jơlan hơdră mơng blan 10/2021 anai mơtăm.

- Ƀing gơmơi hơmâo tơlơi pơpŭ kơ ih yua kơ hơmâo Khua pơ ala mơnuih ƀon sang dêh čar ruah ngă Khua ding jum, Khua jơnum min djuai ania, hăng lĕ mơnuih git gai hơdôm anom bruă gah djuai ania, him lăng ih glăk pơmĭn nao lu bruă kiăng pơphô brơi Kơnuk kơna tŏ tui gum djru hăng djru brơi klă dong kơ mơnuih djuai ania ƀiă ?

Ơi Hầu A Lềnh: Ƀing gơmơi pơsit tong, sa lĕ kiăng gir run tŏ tui bruă mă mơng ƀing mơnuih apăn bruă, khua mua hlâo anun, kah hăng ƀing apăn bruă djru gah bruă mơnuih djuai ania ƀiă amăng 75 thun laih rơgao, kiăng tŏ tui hrŏm hăng djop anom bruă, gơnong bruă, ding jum gơnong dlông hăng ƀon lan pơphô bruă brơi Ping gah kiăng hơmâo hơdră bruă, tơlơi črâo trun yôm phăn, pơplih phrâo, hăng pok pơhai tŭ yua hơdôm hơdră bruă anun. Biă mă ñu lĕ Tơlơi pơsit mrô 88 mơng Khua pơ ala mơnuih ƀon sang dêh čar lơ̆m tŭ yap akŏ bruă pơđĭ kyar bơwih ƀong huă mơnuih mơnam kual mơnuih djuai ania ƀiă hăng kual ataih, asuek amăng rơwang phrâo pơ anăp anai.

- Ơ Khua ding jum, mơng tơlơi hơdip sit nik hăng bruă mă rĭm hrơi, ih pơmĭn hiưm pă kơ tơlơi dưi amăng pơđĭ kyar ƀơi kual ataih, asuek, ơ ơi ?

Ơi Hầu A Lềnh: Găn rơgao thun blan hrăm, mă bruă hăng djru pơđĭ kyar ƀơi kual mơnuih djuai ania ƀiă, ƀing gơmơi ƀuh kual mơnuih djuai ania ƀiă lĕ kual hơmâo lu anŏ yôm phara. Anai lĕ kual hơmâo lu tơlơi dưi kiăng mă yua, amăng bơwih ƀong huă, grua grua djuai ania, wai pơgang rơnuk rơnua kah hăng kual hơmâo gru grua yôm phara mơng djuai ania ƀiă. Hơdôm tơlơi dưi yôm tui anun hơmâo Ping gah, Kơnuk kơna pơsit tong mơng hơdôm rơwang bruă hlâo anun hăng hơmâo lu hơdră kiăng kơ pơphun mă yua hơdôm anŏ yôm kiăng kơ hrưn đĭ tơlơi hơdip kơ mơnuih ƀon sang. Samơ̆, hrŏm hăng boh than dưi ngă ăt dŏ lu tơlơi ngă tơnap tap. Biă mă ñu lĕ anih anom, jơlan glông, pơtô hrăm, bơwih ƀong huă hăng sĭ mơdrô gơnam tam mơng ană plơi pla.

Hầu A Lềnh: Khua ding jum, Khua Jơnum min djuai ania

- Tui hăng ih pơmĭn, hơdră bruă pă lăp djơ̆ amăng thun blan ră anai kiăng pơtrut pơsur hơdôm kual glăk bưp tơnap amăng pơđĭ kyar ?

Ơi Hầu A Lềnh: Tui ƀing gơmơi pơmĭn hơdôm hơdră bruă akŏ phun blung hlâo lĕ ngă kiăo tui hơdră bruă, tơlơi črâo trun mơng Ping gah, kơnuk kơna. Biă mă ñu lĕ tơlơi pơsit mơng Jơnum Ping gah djop gưl. Sit biă ñu lĕ giăm anai, amăng tơlơi pơsit mơng Jơnum Ping gah đơ đam dêh čar tal 13 hơmâo lăi rơđah hơdôm hơdră yôm phăn hăng čih tong ten. Kơnuk kơna ăt pok pơhai ngă tui sit nik amăng jơlan hơdră bruă mă mơng Kơnuk kơna. Tui kâo pơmĭn hơdôm hơdră bruă mơng Ping gah, Kơnuk kơna ră anai lĕ čih tong ten laih. Bruă dŏ glăi lĕ pơphun ngă tui hơdôm hơdră bruă anun kiăng kơ đing nao hăng hơmâo tơlơi gum djru mơng djop anom bruă pơ anăp anai. Anai lĕ hơdôm hơdră bruă tong ten amra pơplih tơlơi hơdip kơ mơnuih ƀon sang.

- Khua ding jum hơmâo Khua dêh čar ơi Phạm Minh Chính jao ngă kơ-iăng khua Khul git gai Jơlan hơdră tui hơnong pơkă dêh čar amăng pơđĭ kyar bơwih ƀong huă mơnuih mơnam ƀơi kual mơnuih djuai ania ƀiă hăng kual ataih, asuek rơwang thun 2021-2030, Khua ding jum him lăng amra rơkâo đĭ Khua dêh čar ta pơtrun hơdôm hơdră bruă hiưm pă kiăng kơ ngă tŭ yua jơlan hơdră tui hơnong pơkă dêh čar yôm phun anai ?

Ơi Hầu A lềnh: Mơng bruă mơ-it nao Khul sem lăng Kơnuk kơna hră lăi pơthâo kơsem min anŏ dưi ngă, amra mơ-it nao Khua dêh čar ta pơsit hơdră tuh pơ alin, hăng mơ-it Ƀirô khua pơ ala mơnuih ƀon sang dêh čar  amăng jơnum blung a Khua mua pơ ala mơnuih ƀon sang dêh čar tal 15 kiăng kơ pơsit bruă tuh pơ alin. Ră anai ƀing gơmơi glăk ha amăng plĕ prap lui hơdôm hră pơ-ar bơdjơ̆ nao; hơmâo hơdôm hơnong pơkă, mrô jŭ yap, tơlơi pơkă pơpha rơnoh prăk, hơdôm Tơlơi pơtrun črâo ba bruă pơphun ngă tui pok pơhai jơlan hơdră; črâo ba ƀon lan akŏ pơjing Khul git gai, anom pơphun bruă mă; laih dong pơgiong hơdră bruă laih dong jơlan hơdră bruă mă rơwang mơng anai truh thun 2025 mơng Khul git gai Jơlan hơdră tui hơnong pơkă.

Hrŏm hăng anun Jơnum min djuai ania gum hrŏm hăng djop ding jum, gơnong bruă, anom bruă bơdjơ̆ nao čih hră pơ-ar, hơdră bruă mơ-it nao Khua dêh čar kĭ amăng rơwang mơng anai truh blan 9 thun 2021. Hăng pran gir run amăng thun 2021 amra pơgiong abih hơdră bruă hăng tơlơi črâo trun kiăng kơ ngă ha amăng plĕ mơng gơnong dlông truh ƀon lan, mơng anun pok pơhai jơlan hơdră anai tŭ yua hloh.

Hai, bơni kơ Khua ding jum hŏ!

Siu Đoan: Pơblang