VOV4.Jarai - Dŏ giăm ha blan yơh, rơbêh kơ ha klăk čô čơđai sang hră đơ đam dêh čar ta amra mut nao pơplông abih anih 12 thun 2021. Truh ră anai, hơdôm tơring čar amăng đơ đam dêh čar hơmâo pok pơhai bruă prap lui tal pơplông anai, amăng anun ƀing khua mua djop anom bruă pơtô hrăm, djop gơnong bruă, khua mua gong gai ƀon lan kiăng gơgrong, anăp nao hơnong pơkă pơphun pơplông rơnuk rơnua, tơpă sit.

Truh ră anai, djop tơring čar hơmâo akŏ pơjing Khul git gai tal pơplông abih anih 12 thun 2021 amăng tơring čar, pơpha tong ten brơi hơdôm anom bruă bơdjơ̆ nao, amăng anun gơnong bruă pơtô hrăm amra pơjing hơdră pơphun pơplông brơi lăp djơ̆ amăng hrơi blan klin Covid-19 glăk lar hyu. Sa, dua tơring čar anun lĕ Hải Phòng, Daklak … hơmâo akŏ pơjing wŏt Khul git gai gưl tơring glông, plơi prong kiăng djru brơi bruă pơplông ƀơi djop sang hră ƀơi ƀon lan. Amăng hrơi blan klin ngă dŏ tơnap tap, rơngiao hăng mrô puang pơplông sit nik, djop tơring čar, plơi prong lêng kơ akŏ pơjing hơdôm hơdră čom puang phara brơi ƀing čơđai lĕ F1 kiăng pơhlôm brơi tơlơi dưi kơ ƀing gơñu. Ƀơi hơdôm anih pơplông lêng kơ prap lui djop gơnam tam, măi mok pioh pơgang klin Covid-19.

Ơi Nguyễn Văn Long, Kơ-iăng khua gơnong bruă pơtô hrăm tơring čar Gialai brơi thâo, tơring čar hơmâo rơbêh 14 rơbâo čô čơđai čih anăn nao pơplông, hăng amra pơphun pơplông ƀơi 39 anih. Tơring čar hơmâo pơjing akŏ bruă pơplông abih anih 12 hăng 4 gưl pioh pơgang klin Covid-19. Ră anai hrŏm hăng bruă pơtô hrăm prap lui tal pơplông, tơring čar ăt kơtưn amăng bruă pơtô pơblang, hmao tlôn lăi pơthâo brơi ƀing apăn bruă, nai pơtô, mơnuih mă bruă kah hăng ƀing čơđai sang hră, amĭ ama kơ bruă pơgang klin hrŏm hăng hơdôm tơlơi pơhŭi hlâo mơng anom bruă bơdjơ̆ nao amăng pơgang klin.

Gơnong bruă pơtô hrăm hơmâo git gai djop anom bruă pok pơhai hơdôm bruă prap lui tal pơplông djơ̆ hăng tơlơi pơkă, djơ̆ hrơi mông, laih dong pơhlôm amăng bruă pơgang klin amăng hrơi blan klin Covid-19 glăk lar hyu ră anai. Amăng anun hơmâo 4 jơlan hơdră pơphun pơplông lăng kar hăng 4 gưl hluai tui tơlơi tơnap tap mơng klin. Tal pơplông ăt pơphun djơ̆ hăng tơlơi pơkă mơng Ding jum pơtô hrăm, gơnong bruă pơtô hrăm ăt hơmâo hră pơ-ar rơkâo ƀing čơđai sang hră, ƀing nai pơtô hăng mơnuih apăn bruă khŏm nao phaih gah ia jrao 7 hrơi hlâo kơ hrơi pơphun pơplông. Tơdơi anun mơ-it nao abih hơdôm anih čih anăn pơphun pơplông kiăng kơ sem lăng”.

Anai lĕ sa amăng hơdôm tơring čar hơmâo mrô čơđai nao pơplông lu hloh amăng đơ đam dêh čar, hăng rơbêh 88 rơbâo čôđai sang hră, ơi Lê Hoài Nam, Kơ-iăng khua gơnong bruă pơtô hrăm ƀôn prong Hồ Chí Minhbrơi thâo, gơnong bruă hơmâo pơtrun lu hră pơ-ar črâo ba bruă pơplông brơi kơ djop sang hră amăng ƀôn prong, hơdôm sang hră pơphun pơplông amra prap lui djop mơta gơnam tam, măi mok kah hăng mơnuih apăn bruă kiăng kơ djru brơi tal pơplông, mah prăk mă yua amăng tal pơplông anai lu biă mă yua kơ kiăng pơhlôm bruă pơgang klin dong.

Ƀing gơmơi ăt hơmâo prap lui laih dong ƀôn prong hơmâo tuh pơ alin kiăng kơ blơi gơnam tam măi mok pioh pơgang klin ƀơi 160 anih pơphun pơplông, ba nao mă yua rơbêh 1 klai get ia jrao rao tơngan, khăn gôm ƀô̆ hăng pơhlôm rĭm anih pơplông lêng kơ hơmâo get ia jrao rao tơngan, măi pơčrăng lăng hyuh amăng drơi jăn, laih dong ngă tui tơlơi črâo trun 5K.

Amăng mông jơnum lăng nao rai amăng tivi pơčrông sai bruă pơphun pơplông abih anih 12 thun 2021 phrâo anai hơmâo Ding jum pơtô hrăm pơphun hrŏm hăng 63 boh tơring čar, ƀôn prong, khua ding jum pơtô hrăm lăng yôm bruă prap lui tal pơplông ƀơi hơdôm tơring čar, ƀôn prong. Lăi pơtong tơlơi yôm amăng tal pơplông anai, Kơ-iăng khua ding jum pơtom hiăp Nguyễn Hưũ Độ ăt rơkâo khul pơphun pơplông prap lui djop mơta gơnam tam, biă mă ñu lĕ mơnuih apăn bruă kiăng kơ tal pơplông pơhun rơnuk rơnua, tơpă sit hăng djơ̆ hăng tơlơi pơkă:

Ruah djơ̆ mơnuih, jao djơ̆ bruă. Ƀing gơmơi ăt lăng bruă yôm phun lĕ pơphun pơplông brơi tơpă sit, klă hloh, pơhlôm bơkơnar yua anun bruă ruah djơ̆ mơnuih lĕ yôm phăn biă mă. Ƀing mơnuih rơgơi kơhnâo, thâo mă bruă, hơdip ba gru tơpă, biă mă ñu lĕ ruah ƀing mơnuih apăn akŏ, biă ñu ƀơi hơdôm sang hră pơphun pơplông, laih dong khua mua - Khua khul wai lăng tal pơplông. Ƀing apăn akŏ tơdah ngă klă tal pơplông amra pơphun tơpă sit.

Prap lui tal pơplông abih anih 12 thun 2021, Ding jum pơtô hrăm gum hrŏm hăng djop tơring čar ječ ameč prap lui, pơhlôm djơ̆ hăng tơlơi pơkă. Samơ̆ giăm anai, klin Covid-19 glăk ngă tơnap tap. Ngă tui tơlơi găn rơgao mơng thun hlâo, Ding jum pơtô hrăm hrŏm hăng hơdôm tơring čar amra pơphun tal pơplông abih anih 12 thun anai djơ̆ hăng hrơi mông pơkă, samơ̆ amra pơphun tal pơplông amăng 2 hrơi anun lĕ lơ 7 hăng lơ 8 blan 7 ƀơi hơdôm anih huăi hơmâo mơnuih ƀă klin laih dong ƀu hơmâo čơđai F0, F1, F2. Ơi Mai Văn Trinh, Khua anom bruă wai lăng bruă pơplông, Ding jum pơtô hrăm brơi thâo:

Tơdah truh hrơi pơplông, ăt dŏ hơmâo anih guang dar ƀudah pơčlah tui tơlơi črâo trun mơng Khua dêh čar pioh pơgang klin Covid-19 tal pơplông mơng lơ 7-8/72021 amra pơphun konong ƀơi hơdôm anih pơhlôm huăi ngă lar hyu klin hăng pơphun pơplông brơi ƀingčơđai  ƀu djơ̆ lĕ F0, F1,F2. Yua anun, Ding jum pơtô hrăm amra hrŏm hăng tơring čar, ƀôn prong pơphun dong pơplông tal 2 brơi ƀing čơđai aka ƀu dưi pơplông amăng tal sa.

Hăng bruă pơplông mut hrăm gưl prong, cao đẳng, biă mă ñu, hăng ƀing čơđai mă puang pơplông abih anih 12 thun 2021, Ding jum pơtô hrăm amra git gai djop gơnong bruă pơtô hrăm pơplih glăi hơdră bruă, hrơi mông, mrô puang mut hrăm gưl prong kiăng kơ pơhlôm brơi ƀing čơđai dưi mă mrô puang pơplông abih anih 12 thun 2021 mơng hơdôm tal pơplông anai. Ding jum pơtô hrăm ăt amra pơjing tơlơi pơplông phara amăng hơdôm tal pơplông kiăng pơhlôm tơlơi pơplông tơnap bơkơnar mơng anun pơhlôm klă brơi ƀing čơđai amăng hơdôm tal pơplông.

Siu Đoan: Pơblang