VOV4.Jarai - Tơdơi kơ 8 hrơi ngă bruă klă, tŭ yua, rơwang hrơi tơjuh rơgao, ƀơi Sang bruă khua git gai pơ ala mơnuih ƀon sang dêh čar, yŭ kơ tơlơi git gai mơng Khua git gai pơ ala mơnuih ƀon sang dêh čar ơi Vương Đình Huệ, Jơnum min Khua apăn bruă git gai pơ ala mơnuih ƀon sang dêh čar hơmâo pơđut laih jơnum lok 3, ngă giong jơlan hơdră prăp lui kơ hơdôm tơlơi amăng mông Jơnum lok 2, Ƀirô khua git gai pơ ala mơnuih ƀon sang dêh čar tal 15.

Khua git gai pơ ala mơnuih ƀon sang ơi Vương Đình Huệ lăi rơđah, anai jing sa amăng hơdôm mông jơnum tui tơđar sui hloh amăng thun mơng Jơnum min khua git gai pơ ala mơnuih ƀon sang dêh čar či pơgôp hiăp amăng hơdôm tơlơi ba pơdah thâo pơ Ƀirô khua pơ ala mơnuih ƀon sang jơnum lok 2. Mơng bruă sem lăng, bơkơtuai, Jơnum min khua apăn bruă git gai pơ ala mơnuih ƀon sang tŭ ư ngă rơđah hơdôm tơlơi hơmâo tŭ ư hrŏm, hơmâo prăp lui tŏng ten, tơlơi dưi pơdah thâo kơ ƀing khua git gai pơ ala mơnuih ƀon sang dêh čar hăng hơdôm tơlơi kiăng hơmâo pơhrui tui, ngă pơgiong.

Hăng bruă čih pơkra tơlơi phiăn, ƀơi mông jơnum, Jơnum min khua apăn bruă git gai pơ ala mơnuih ƀon sang dêh čar hơmâo hmư̆ hăng pơgôp hiăp hăng 6 kơčăo bruă tơlơi phiăn. Jơnum min khua apăn bruă git gai pơ ala mơnuih ƀon sang dêh čar lăng yôm biă tơlơi gum hrŏm ngă bruă kơplah wah anom bruă čih hră tơlơi phiăn hăng hơdôm anom bruă mơng Ƀirô khua git gai pơ ala mơnuih ƀon sang dêh čar hăng pran jua ngă bruă prong, ngă tañ, ngă mơng ataih amăng bruă prăp lui hơdôm kơčăo bruă Tơlơi phiăn. Tơlơi anai pơdah pơƀuh tơlơi gir run pơplih phrâo mơng Khua mua git gai pơ ala mơnuih ƀon sang dêh čar, Jơnum min khua apăn bruă git gai pơ ala mơnuih ƀon sang, Khul wai lăng Djuai ania hăng hơdôm Jơnum min mơng Ƀirô khua pơ ala mơnuih ƀon sang. Khua git gai pơ ala mơnuih ƀon sang dêh čar kiăng anom bruă čih pơkra tơlơi phiăn ngă pơgiong, pơƀut pơđĭ tui anŏ klă hơdôm tơlơi phiăn, kiăng abih bang khua tŭ ư lơ̆m pơdah thâo pơ Khua git gai pơ ala mơnuih ƀon sang dêh čar hăng lơ̆m hơmâo pơtrun tơlơi phiăn, hơdôm kơčăo bruă tơlơi phiăn amra pơjing rai tơlơi phiăn, hơdră ngă bruă kơtưn đĭ amăng sui thun, pơtrut pơđĭ kyar:

“Jơnum min khua apăn bruă git gai pơ ala mơnuih ƀon sang tŭ ư pơhrua tui Tơlơi phiăn pơplih pơkra, pơhrui tui sa, dua mơta tơlơi mơng Tơlơi phiăn tơgŭ kơđi hình sự amăng jơlan hơdră čih pơkra tơlơi phiăn thun thun 2021 pơdah thâo pơ ƀing Khua git gai pơ ala mơnuih ƀon sang dêh čar sem lăng, pơsit brơi ƀơi mông Jơnum lok 2, pơphun tum pơƀut glăi kiăng tañ ƀơi sa mông jơnum. Ƀơi mông jơnum anai, rơngiao kơ bruă gum pơgôp, lăi pơthâo mơng Kơnuk kơna lĕ Jơnum min khua apăn bruă git gai pơ ala mơnuih ƀon sang ăt gum pơgôp kah hăng jŭ yap, sem lăng tơlơi jŭ yap mơng hơdôm boh tơring čar, ƀon prong kah hăng hơdôm hnong pơkă gah tơlơi bơwih ƀong, GIDP, mrô yap tui akŏ mơnuih hăng hơdôm mrô pơkŏn”.

Jơnum min khua apă bruă git gai pơ ala mơnuih ƀon sang dêh čar pơđut mông jơnum lok 3.

Khua git gai pơ ala mơnuih ƀon sang dêh čar lăi: lăng nao abih bang, hơdôm tơlơi lăi pơthâo ƀơi mông jơnum lêng hơmâo anŏ klă, pơdah rai tơlơi pơplih phrâo klă hiam ăt kah hăng lăi pơthâo glăi hơdôm tơlơi gir run, tơlơi gơgrong bruă hăng tơlơi khut khăt mơng hơdôm anom bruă amăng mông ngă bruă. Rơkâo kơnuk kơna, hơdôm anom bruă bơdjơ̆ nao pơƀut git gai ngă sa, dua hơdră pơsir hĭ tơlơi aka ƀu djơ̆, tơlơi dŏ tơdu.

Sa tơlơi yôm phhun hơmâo mơnuih ƀon sang pơđing hmư̆ lĕ Jơnum min khua apăn bruă git gai pơ ala mơnuih ƀon sang brơi pơmut 14 rơbâo 620 klai prăk amăng prăk pioh pơđom mơng kơnuk kơna, pioh mă bruă amăng bruă pơgang klin. Lăi pơthâo glăi ƀơi mông jơnum, Khua ding jum prăk kăk ơi Hồ Đức Phớc lăi rơđah: Yua tơlơi bơbeč mơng klin prong đơi, hơdôm tơring čar hơmâo mă yua abih laih prăk pơđom lui, Keh prăk pơđom lui, mă yua prăk pơkrem hăng tơlơi hơmâo pơkŏn dong pioh yua amăng bruă pơgang klin Covid-19 hăng djru ba mơnuih ƀon sang tơnao tap kơtang yua klin ngă. Yua hnun, kiăng ba pơmut 14 rơbâo 620 klai prăk amăng prăk pơđom lui pioh kơ bruă pơhlôm pơgang klin.

“Keh prăk vaccine truh mông anai hơmâo laih 8 rơbâo 700 klai prăk. Kơnong mơng Ding jum prăk kăk hơmâo brơi rơbêh 14 rơbâo klai prăk pioh blơi vaccine laih. Vaccine ră anai kah hĭ mrô hơmâo pơsit hlâo, hơmâo thim dong 3,5 rơbâo klai mơng Keh prăk vaccine. Mrô dŏ glăi pioh yua amăng prăk pioh pơđom kiăng blơi dong. Tal dua, prăk pioh pơgang klin mơng  Ding jum prăk kăk hơmâo kiăng hơdôm tơring čar lăi pơthâo, tơdơi kơ hơmâo tơlơi lăi pơthâp mơng Ding jum prăk kăk amra lăi pơthâo hăng Jơnum min khua apăn bruă git gai pơ ala mơnuih ƀon sang dêh čar kơ prăk kăk pioh pơgang klin mơng mrô prăk mơng tơring čar”.

Ƀơi mông jơnum, abih bang ƀing khua apăn bruă git gai pơ ala mơnuih ƀonsang dêh čar tŭ ư mơ-it 14 rơbâo 620 klai prăk amăng mrô prăk kơnuk kơna pioh pơgang klin, pơhlôm yua pơkrem, tŭ yua djơ̆ tui tơlơi phiăn prăk kăk kơnuk kơna hăng tơlơi pơtrun 30 mơng Ƀirô khua git gai pơ ala mơnuih ƀon sang dêh čar hăng hră lăi pơthâo glăi mơng Jơnum min khua apăn bruă git gai pơ ala mơnuih ƀon sang dêh čar tui tơlơi pơkôl pơkă.

Khua git gai pơ ala mơnuih ƀon sang dêh čar ơi Vương Đình Huệ đĭ pơhiăp pơđut mông jơnum.

Kơ bruă wai lăng, Khua git gai pơ ala mơnuih ƀon sang dêh čar lăi rơđah, ƀơi mông jơnum anai, Jơnum min khua apăn bruă git gai pơ ala mơnuih ƀon sang dêh čar hơmâo bơkơtuai, pơgôp hiăp kơ kơčăo bruă rơđah rơđông hăng tơlơi phun kiăng wai lăng mơng hơdôm mơng akŏ bruă wai lăng kơtang mơng Ƀirô khua git gai pơ ala mơnuih ƀon sang dêh čar hăng tơlơi wai lăng mơng Jơnum min khua git gai pơ ala mơnuih ƀon sang dêh čar amăng thun 2022. Kiăo tui tơlơi pơgôp hiăp mơng Jơnum min khua apăn bruă git gai pơ ala mơnuih ƀon sang, Khua čih pioh mơng Ƀirô khua git gai pơ ala mơnuih ƀon sang hăng hơdôm khua grup wai lăng khŏm gơgrong ngă giong hăng kĭ brơi akŏ bruă wai lăng đah mơng pơphun ngă:

“Jơnum min khua apăn bruă git gai pơ ala mơnuih ƀon sang tŭ ư kiăng pơphun jơnum lăng nao rai mơng ataih amăng tivi đah mơng ƀrô pơphun pok pơhai ƀrô pơsur hơdôm anom bruă ngă jơlan hơdră wai lăng. Tơlơi phrâo hloh lĕ jak iâu Anom bruă jŭ yap prăk kăk kơnuk kơna gum wai lăng hrŏm. lăng tơlơi pơplih phrâo amăng bruă wai lăng, pơđĭ tui anŏ klă, tŭ yua mơng bruă wai lăng lĕ sa amăng hơdôm tơlơi phun amăng bruă pơplih phrâo, pơđĭ tui anŏ apăn bruă  mơng khua mua pơ ala mơnuih ƀon sang dêh čar tal 15”.

Pơhiăp pơđut mông jơnum lok 3, Khua git gai pơ ala mơnuih ƀon sang dêh čar ơi Vương Đình Huệ lăi, ƀơi mông jơnum Jơnum min Khua apăn bruă git gai pơ ala mơnuih ƀon sang dêh čar pơgôp hiăp kơ 6 tơlơi phiăn hăng lu tơlơi yôm phun pơkŏn. Kơ bruă prăp lui mông jơnum lok 2, kiăng hơmâo prăp lui klă hloh tơlơi rơnuk rơnua, hơđong kơjăp pơgang klin, pơhlôm hơmâo hơdră pơsir tañ hơdeč hmar tơdah ƀing khua nao jơnum hơmâo tơlơi truh sat. Rơkâo tơdơi mông jơnum hơdôm anom bruă tañ ngă giong hră pơ-ar či kĭ brơi tơlơi lăi pơthâo glăi mơng mông jơnum.

Siu H’Mai: Pơblang