VOV4.Jarai - Tlam lơ 1/8, Khua git gai Ping gah ƀon prong Hồ Chí Minh ơi Nguyễn Văn Nên hăng Khua ding jum ia jrao ơi Nguyễn Thanh Long nao lăng bruă akŏ pơdong Anih pơjrao kơ ƀing ƀă klin Covid-19 ruă kraih. Ding jum ia jrao kiăng ječ ameč ba nao mơnuih ƀă klin Covid-19 ƀơi 4 anih pơjrao tơlơi ruă kơtang anai; jao kơ Sang ia jrao Đại học Y dược ƀon prong Hồ Chí Minh gơgrong bruă anai. Anih pơjrao kơ mơnuih ƀă klin Covid-19 amra hơmâo mă yua glăi gơnam hơmâo hơđăp mơng sang ia jrao kah hăng măi suă jua, sưng đih.

Khua mua ƀon prong Hồ Chí Minh hăng Ding jum ia jrao nao lăng anih pơjrao mơnuih ruă kơtang.

Ƀơi anăp lĕ hơmâo 70 boh sưng, him lăng amra pơđĭ truh 500 boh sưng đih. Pơphun mơng lơ 2/8, sang ia jrao amra čơkă mơnuih ƀă klin Covid-19. Grup mă bruă hơmâo nao lăng laih Anih pơjrao mơnuih ruă kơtang hơmâo 500 boh sưng đih ƀơi Sang ia jrao pơdong jăng jai mrô 16 (kuâ̆n 7, ƀon prong Hồ Chí Minh), sang ia jrao Bạch Mai glăk jao git gai bruă anai. Khua git gai Ping gah ƀon prong ơi Nguyễn Văn Nên pơtă hlâo kiăng ngă hră pơ-ar amuñ, tañ ƀiă, pơhrua tui hơdôm gơnam dŏ kơƀah đah mơng čơkă mơnuih ruă kơtang nao pơjrao.

Siu H’Mai: Pơblang