VOV4.Jarai - Tơdơi kơ Ding jum pơtô pơhrăm lăi pơthâo puang mă ƀăng gưl 3 thun 2021, sa dua bôh sang gưl dlông pơphun lăi pơthâo puang ruah čơđai. Thun anai, puang hơnong ñu mă ƀăng gưl 3 đĭ lu hăng lu mơta tơlơi pơplông. Hrom hăng anun, hơdôm bôh sang hră gưl dlông hmâo pioh laih tơhnal pơkă kơ hơdôm jơlan gah pha ra kah hăng: Pel ĕp hră čih puang hrăm rim blan, tơlơi pơplông tui jar kơmar… anun mrô pơkă puang mă ƀăng gưl 3 amra hrŏ trun hơđong. Yua anun, puang ruah mut gưl dlông thun anai dưi pơkă lăng hmâo amra đĭ hloh bơhmu hăng hơdôm thun hlâo adih. Ƀing gơmơi hmâo tơlơi bơkơtuai hăng Nai tha prin, Nai prin tha Nguyễn Thu Thủy, Khua Anom wai hăng bruă pơtô hrăm gưl dlông – Ding jum pơtô pơhrăm dêh čar ta kơ tơlơi anai.

-Ơ yă Nguyễn Thu Thuỷ! Thun anai, lu sang hră gưl dlông tô̆ tui dong bruă ruah čơđai đĭ hrăm gưl dlông tui lu jơlan gah, puang pơplông mă ƀăng gưl 3 ăt dưi lăng lĕ lu hloh kơ thun hlâo mơn, tơlơi anai bơdjơ̆ nao hiưm ñu puang djơ̆ hơnong hrăm gưl dlông?

Nai tha prin Nguyễn Thu Thuỷ: Kah hăng tơlơi pơhing mơng Ding jum pơtô pơhrăm hmâo lăi pơthâo hlâo kơ anun, puang pơplông mă ƀăng gưl 3 thun 2021 đĭ hloh amăng lu mơta tơlơi pơplông. Amăng anun, mrô tơlơi pơplông hmâo puang lu ăt đĭ tui mơn hăng hơdôm tơlơi pơplông kah hăng tơlơi Angle, Ngữ văn, Giáo dục công dân, Sinh học…

Puang ruah mă dưm dưm hăng bôh tơhnal pơplông mă ƀăng gưl 3 ƀơi anai lĕ puang dưi ruah đĭ mơng hơdôm bôh sang hră hluai tui lu tơhnal kah hăng bôh tơhnal pơplông mă ƀăng gưl 3 (puang mơng hơdôm mơta tơlơi pơplông jing puang mơng ruah đĭ anih), tơhnal ruah đĭ anih, mrô čơđai ngă hră ruah mut sa gơnong bruă, sa jơlan hơdră pơtô pơhrăm.

Puang hơnong ñu lu, mrô mơta tơlơi pơplông hmâo puang 8 hăng dlông hloh ăt lu mơn, glông puang rơhaih hloh anun bruă ruah mă amra gêh gal hloh, hơdôm bôh sang hră hmâo tơlơi gah amăng bruă pơsit tơhnal pơkă pơhlôm kơjăp mut hrăm. Rơngiao kơ bruă puang sa dua pơta tơlơi pơplông dlông hloh bơhmu hăng thun 2020 lĕ, bruă hơdôm bôh sang hră gưl dlông hmâo pioh laih mrô pơkă găp tŭ kơ hơdôm jơlan gah pha ra kah hăng ruah mă puang hrăm amăng hơdôm thun hrăm gưl 3, ruah puang pơsit bôh thâo ia rơgơi, tơlơi pơplông pơplih tui jar kơmar… anun mrô pioh ruah puang pơplông mă ƀăng gưl 3 amra hrŏ trun hơđong. Anai ăt lĕ sa bôh than yôm phăn ngă puang ruah mut gưl dlông thun anai amra đĭ dlông ƀơ ƀiă hloh kơ hơdôm thun hlâo adih.

Nai tha prin, Nai prin tha Nguyễn Thu Thuỷ, Khua Anom wai lăng bruă pơtô pơhrăm gưl dlông – Ding jum pơtô pơhrăm dêh čar ta

-Čơđai pơmin lĕ rơnoh tơnap hăng amuñ hlêh hloh kơplah wah hơdôm mơta tơlơi hrăm amăng ƀut tơlơi hrăm amra ngă tơnap kơ čơđai sang hră amăng bruă pơplih tơlơi kiăng hrăm, ih pơsit hiưm hơpă kơ tơlơi anai?

Nai tha prin Nguyễn Thu Thuỷ: Tơlơi pơkă ruah čơđai đĭ hrăm gưl dlông mă yua ră anai brơi čơđai dưi rơkâo ruah mă bruă hrăm tui tơlơi čang rơmang, rim ƀut hrăm mut sa gơnong bruă lĕ sa tơlơi čang rơmang laih. Hơdôm bôh sang hră hluai tui puang mơng dlông trun kiăng ruah, ƀu djơ̆ hluai tui tơlơi ruah kiăng hrăm pioh ruah ôh, rơngiao kơ tơdah hmâo lu čơđai hmâo hrom rơnoh puang ƀơi rơnuč hră čih anăn, yua anun yơh, čơđai amra ngă hră ruah hăng lu ƀut tơlơi hrăm mut sa gơnong bruă. Yua anun ƀing čơđai tâ̆o hloh ruah hơdôm ƀut tơlơi hrăm hmâo mơta tơlơi hră mơ̆ pô hmâo puang lu kiăng gum hrom ruah hăng hmâo anô̆ gal hloh. Hăng bruă mă yua hơdră phrâo amăng ruah puang đĭ hrăm gưl dlông, Cao đẳng, čơđai hmâo lu tơhnal, lu wot kiăng pơplih tơlơi kiăng hrăm djơ̆ hloh, sit hloh hluai tui bôh tơhnal pơplông mă ƀăng gưl 3 mơng pô.

-Ơ yă, thun anai hơdôm bôh sang hră gưl dlông hmâo lu hơdră ruah puang čơđai hăng tơhnal pơkă lu hloh bơhmu hăng hơdôm thun hlâo adih. Tơlơi anai, ñu bơdjơ̆ nao mơn jơlan gah ruah čơđai hăng puang pơplông mă ƀăng gưl 3?

 Nai tha prin Nguyễn Thu Thuỷ: Amăng jơlan gah gơgrong pô ruah mă ră anai hăng bruă jai hrơi jai hmâo lu anih anom pơtô pơhrăm lăi pơthâo bruă pơphun ruah pha ra ƀudah pơphun pơplông tui ƀut lĕ mrô pơkă pioh kơ mơnuih ruah mă dưm dưm hăng puang pơplông mă ƀăng gưl 3 hrŏ trun bơhmu hăng hơdôm thun hlâo adih lĕ sit yơh hăng dŏng amăng glông ta hmâo thâo hlâo laih.

Tui hăng mrô yap brơi ƀuh, thun 2021 hơdôm bôh sang hră pioh tơhnal pơkă kơ hơdôm jơlan gah ruah čơđai pha ra lu hloh bơhmu hăng hơdôm thun hlâo adih. Khă hnun hai, ruah tui hơdôm jơlan gah pha ra hluai tui lu tơhnal kah hăng tơhnal pơkă, mrô čơđai rơkâo hrăm bruă hơget, anô̆ kơjăp bruă ruah đĭ gưl dlông, mrô čơđai dưi ruah pơsit mut hrăm… anun mrô čơđai ruah sa mrô hmâo rơnoh pơkă hơdôm ñu. Čơđai lom dưi ruah hăng jơlan gah pha ra mơ̆ dưi ruah hăng pơsit mut hrăm thơ amra ƀu dưi ruah ƀơi hơdôm bôh sang hră pơkon dong tah hăng ƀơi hơdôm jơlan gah pha ra dong tah. Hơdôm bôh sang hră amra khom pơmut hră čih anăn ƀing čơđai hmâo pơsit mut hrăm hăng glông pơkă hăng ƀing čơđai anai amra ƀu pioh ruah tal sa dưm dưm hăng bôh tơhnal pơplông mă ƀăng gưl 3 hăng sit yơh amra ƀu ngă bơdjơ̆ nao tơhnal pơkă ruah čơđai mơng jơlan gah ruah anai tui jơlan gah puang pơplông mă ƀăng gưl 3.

-Ih hmâo tơlơi pơtă hơget kơ ƀing čơđai sang hră kiăng hmâo bôh tơhnal kah hăng tơlơi čang rơmang amăng hơdôm hrơi ruah čơđai đĭ hrăm gưl dlông thun anai?

Nai tha prin Nguyễn Thu Thuỷ: Puang mă ƀăng gưl 3 thun anai lu hloh ƀiă bơhmu hăng thun hlâo, amra hmâo sa dua čô čơđai hmâo 25, 26 puang ăt ƀu dưi ruah đĭ gưl dlông mơn, tơdah ƀu lăng glăi, kơsem min tŏng lom ruah bruă kiăng hrăm. Anun lĕ čơđai tâ̆o hloh khom đing nao hăng puang pô hmâo mơ̆ luh nao đing nao sa dua mrô ƀiă hơdôm gơnong bruă kiăng bơkơtưn hrăm lu mơng sa dua mrô ƀiă sang hră. Lom tơlơi pơplih pơkra bruă kiăng hrăm, čơđai sang hră khom pel ĕp ƀu djơ̆ yua kơ ƀuh puang pô dưm dưm hăng puang pơkă hơnong hrom mơng gơnong bruă anai thun hlâo mơ̆ rơkâo hră mơ̆ ƀu hmâo ruah mă pơhlôm pơkon, yua kơ puang lu lĕ lu hrom hăng rơnoh pơkă hrom, ƀu djơ̆ hmâo mă sa dua čô ôh. Hăng ƀing čơđai ƀuh phing kơ pran jua hăng rơnoh puang lu thơ, tâ̆o hloh pơhrua nao dong tơlơi kiăng hrăm, amra ruah mă sa dua bruă hrăm pô hor, samơ̆ ƀơi lu sang hră pha ra kiăng đĭ tui tơhnal dưi ruah.

 -Rơkâo bơni kơ ih yă Nguyễn Thu Thuỷ, Khua Anom wai lăng bruă pơtô pơhrăm gưl dlông – Ding jum pơtô pơhrăm dêh čar ta kơ bruă bơkơtuai anai.

Siu H’ Prăk: Pô pơblang