VOV4.Jarai - Amăng lu thun rơgao, Puih kơđông pơgang guai lŏn ia Hồ Le (Ƀirô git gai ling tơhan pơgang guai lŏn ia tơring čar Kontum) hmâo pơtrut kơtang bruă pơsur mơnuih ƀôn sang, ngă tui klă jơlan gah, hơdră pơtrun mơng Ping gah, hơdră bruă, tơlơi phiăn mơng Kơnuk kơna, mơng anun djru pơhlôm tơlơi rơnuk rơnua bruă kơđi čar, hơđong pơhlôm mơnuih mơnam kual guai lŏn ia.

Ƀơi anih Puih kơđông pơgang guai lŏn ia Hồ Le wai lăng hmâo 8 bôh plơi mơng să Ia Đal hăng Ia Tơi (tơring glông Ia Hdrai, tơring čar Kontum) hăng 717 bôh sang anô̆, 2.245 čô mơnuih, biă ñu lĕ mơnuih mă bruă ƀơi hơdôm plah tơsiong đang hmua gah Anom 716 (Binh đoàn 15) hăng Sang bruă tuh pơplai hăng pơđĭ kyar Duy Tân. Amăng 17 thun rơgao, yap mơng hrơi pơdŏng Puih kơđông truh ră anai, rơngiao kơ bruă hyu tir, wai lăng pơgang guai lŏn ia, Puih kơđông ngă klă na nao bruă pơsur mơnuih ƀôn sang.

Biă ñu, mơng akô̆ thun 2020 truh ră anai, Puih kơđông hmâo pok pơhai khul mơnuih hyu tir, wai lăng, dô̆ gak pơkĕ hrom pơgang, pơgăn klin Covid-19, pơhlôm wai lăng kơjăp guai lŏn ia, anih anom mă bruă. Amăng anun, hmâo pơphun giăm truh 150 tal wai lăng rô hyu pơgang guai lŏn ia, pơgang, pơgăn klin Covid-19. Hrom hăng anun, djă pioh tơpă tơlơi pơkă kual guai lŏn ia, hmao tlôn thâo, pơsir hơdôm mơnuih mut tơbiă ƀu djơ̆ phiăn; pơphun jah agaih jơlan nao rai pơ̆ hơdôm anih pơdŏng pŏng guai lŏn ia hăng jơlan hyu tir guai lŏn ia hmâo 19 km; djă pioh 3 grŭp hyu mă bruă ƀơi anai gum hrom hăng gong gai plơi pla, hmao pơsir hơdôm tơlơi phrâo hmâo ƀơi Puih kơđông gơgrong bruă .

Puih kơđông pơgang guai lŏn ia Hồ Le pel ĕp, pơpha jrao brơi đôč kơ mơnuih ƀôn sang să Ia Đal, tơring glông Ia Hdrai, Kontum

Amăng bruă pơsur mơnuih ƀôn sang, Puih kơđông hmâo pơphô brơi gưl Ping gah, Gong gai 2 să Ia Đal hăng Ia Tơi (tơring glông Ia Hdrai) hơkrŭ đĭ khul mơnuih apăn bruă să, plơi ba glăi bôh tơhnal; pơphô pơtô brơi dong kơ 6 čô mơnuih mơbruă kiăng pơđĭ kyar bruă pơmut mơnuih mut ping gah; gum hrom hăng Jơnum min mơnuih ƀôn sang să Ia Đal, Binh đoàn 15 pơphun djru Keh prăk “Hrơi yua kơ mơnuih ƀun rin” tơring čar hmâo giăm truh 30 klăk prăk; tơña bla pơsur hmâo 24 čô mơnuih mă bruă gah ling tơhan duam ruă, sang anô̆ hmâo tơlơi hơdip tơnap hmâo nua 9 klăk prăk; ƀơk brơi rơbêh kơ 40 anung gơnam hăng rơbêh kơ 600 blah bơnal gôm adung, mơbah kơ hơdôm bôh sang anô̆ hmâo tơlơi hơdip tơnap bơbeč truh, bơdjơ̆ nao yua kơ klin Covid-19; ƀơk 4 anung gơnam kơ čơđai sang hră đom lom djop djuai ania ƀiă tơring glông hăng hơdôm bôh sang hră čơđai anet, gưl sa, gưl 2 să Ia Đal ƀrô djơ̆ hrơi mut sang hră hăng klah čun thun hrăm hmâo nua 6 klăk prăk; ƀơk prăk jơlan hơdră “Gum ba čơđai nao sang hră” brơi 3 čô čơđai sang hră hmâo nua 22 klăk 500 rơbâo prăk; djru 15 klăk prăk kơ sang anô̆ 1 čô čơđai “Ană rông puih kơđông pơgang guai lŏn ia”.

Rơngiao kơ anun, Puih kơđông hmâo pơkiăo nao 12 čô mơnuih apăn bruă tơhan, ling tơhan gum hrom hăng gong gai hăng mơnuih ƀôn sang ƀơi anai gum hrom pơgang apui ƀong 2 ektar dlai klô ƀơi kual thôn 8, să Ia Đal hăng pơgang apui ƀong 3 ektar đang kơ su mơng Anom 716 gah plơi Ia Đer, să Ia Đal; gum hrom hăng Anom bruă mrô 716, Jơnum min mơnuih ƀôn sang să Ia Đal lăi pơhing dŏ dŏng ƀŏng huă agaih hơdjă, pơgang, pơgăn klin ƀơi mơnuih hăng hlô rông dưi 12 mông, hmâo giăm truh 330 wot čô mơnuih gum hrom; djru mơnuih ƀôn sang pơkra glăi 7 bôh sang dô̆ răm tui ƀơ ƀrư̆, klơi hơbơi plum, pĕ bôh ñông hăng bơwih brơi kơ phun kơ phê; djru pơjeh pla hăng pơhlôm brơi hơdôm pluh bôh sang anô̆ gah hơdră bôh thâo pla añăm pơtăm; pơphun hơdră rông rơmô pioh djuai, djru 1 drơi rơmô rông kơ sang anô̆ ƀun rin, hrom hăng anun djru mơnuih ƀôn sang pơkra glăi war hlô rông, čem rông djơ̆ hơdră hơdjă, pơhlôm klin ruă. Puih kơđông ăt pơpha mơn 2 čô mơnuih apăn bruă tơhan, ling tơhan lĕ mơnuih djuai ania ƀiă čơkă ngă adơi ayong djru gum 2 bôh sang anô̆ tơtlaih mơng ƀun rin; pơpha 16 čô mơnuih apăn bruă tơhan, ling tơhan lĕ mơnuih ping gah djru gum 53 bôh sang anô̆ pơđĭ kyar bơwih ƀong.

Ngă tui bruă “Abih bang mơnuih ƀôn sang gum hrom pơgang pô lŏn ia, rơnuk rơnua guai lŏn ia amăng rơnuk phrâo”, Puih kơđông pơgang guai lŏn ia Hồ Le (Ƀirô git gai  Ling tơhan pơgang guai lŏn ia tơring čar Kontum hmâo lăi pơhing, pơsur hmâo 3 grŭp hăng 13 bôh sang anô̆ ƀơi să Ia Đal rơkâo wai lăng mă pô 13 km jơlan guai lŏn ia, 13 pŏng guai lŏn ia hăng 5 grŭp pơgang rơnuk rơnua mơnuih ƀôn sang rơkâo wai lăng mă pô tơlơi rơnuk rơnua hơđong. Hăng să Ia Tơi, ră anai puih kơđông glăk gum hrom pel ĕp, lăi pơhing pơsur khul grŭp, mơnuih, sang anô̆ gum hrom wai lăng mă pô tơlơi rơnuk rơnua hơđong ƀơi kual guai lŏn ia.

Thiếu tá Nguyễn Văn Ngọc – Khua puih kơđông pơgang guai lŏn ia Hồ Le pơsit: Rơgao kơ 17 thun pơdŏng hăng pơjing, hăng phiăn juăt ư-ang mơng “Ling tơhan Wa Hồ”, mơnuih apăn bruă tơhan, ling tơhan Puih kơđông pơgang guai lŏn ia Hồ Le rơgao hơdôm tal ƀu huĭ kơ tơnap, hmâo gum hrom hăng mơnuih ƀôn sang djop djuai ania hơdip mơda ƀơi guai lŏn ia djă kơjăp phao kơtoang pơgang guai lŏn ia kiăng khăp jai hrơi jai kơjăp hloh./.

Siu H’ Prăk: Pô pơblang