VOV4.Jarai-Tom brơi, lơ 31/8, Quân đoàn 3 Ding jum ling tơhan dŏ ƀơi Gia Lai hơmâo  pơgiăng nao 60 tơn gơnam djru kơ mơnuih ƀôn sang kual klin kheng ngă ƀôn prong Hồ Chí Minh. Rơđah biă mă ñu, amăng giăm 60 tơn gơnam kiăng ječ anun mơ̆ng tơhan Quân đoàn 3 djru hơmâo 20 tơn braih,  rơbêh 20 tơn gơnam kah hăng lương khô, añăm mơnong ƀuăt, ia tơsâo, mì tôm, ia rơmă, tơpung mih hăng giăm 19 tơn añăm asăt añăm rơ̆k, hơbơi pơtơi.

 Anai lĕ hơdôm gơnam ƀong huă yua ƀing khua mua, ling tơhan djop sang bruă, puih kơđông mơ̆ng Quân đoàn 3 pơčruh hăng pla pơjing mă amăng puih kơđông thun blan rơgao. Abih bang gơnam anun hơmâo 10 boh rơdêh mơ̆ng Quân đoàn 3 pơgiăng nao, jao kơ Jơnum min djop djuai ania tơring glông Bình Chánh, ƀôn prong Hồ Chí Minh hyu ƀơk pơpha kơ mơnuih ƀôn sang pơ anih pơgang klin.

Nay Jek: Pơblang