VOV4.Jarai - Amăng kơčăo bruă tlâ̆o pơgang klin Covid-19, Quân khu 5 dưi jao bruă tŭ mă, rak pioh, pơgiăng, pha brơi vaccine pơgang Covid-19 kơ 11 bôh tơring čar, ƀôn prong kual Tŏng Krah – Dăp Kơdư ƀơi kual Quân khu. Hơdôm hrơi rơgao, khul pơgiăng, ba nao mơng khul wai lăng Anih dưm vaccine Quân khu 5 ƀu thâo kơ hrơi mlăm, gir pơgiăng vaccine truh pơ̆ hơdôm bôh tơring čar, ƀôn prong, pơhlôm khut khăt amăng djop mơta. Ră anai Quân khu 5 hmâo tŭ mă 14 bôh rơdêh pơgiăng vaccine, anom gum hrom hăng anom rơdêh thut răk pioh, pơsit, pel ĕp ayuh pơ-iă rơ-ơ̆ hơdôm bôh kơthung rơdêh ngă rơ-ơ̆, pơhlôm rơnoh pơkă rơ-ơ̆ klă hloh lom pơgiăng vaccine. Truh ră anai, Anom bơwih kơ bruă dŭ pơgiăng Quân khu 5 hmâo pơhun pơgiăng truh kih 10 tơn gơnam mă yua gah ia jrao hăng giăm truh 300.000 liều vaccine truh pơ̆ hơdôm bôh tơring čar, ƀôn prong amăng kual Tŏng Krah – Dăp Kơdư. Tơlơi gir run mơng hơdôm khul gah Quân khu 5 djru pơtrut tañ rơnoh tlâ̆o pơgang hlôm hlâo Covid-19, pơsit pran jua pơgăn klin./.

Siu H’ Prăk: Pô pơblang