VOV4.Jarai - Amăng lu ring bruă apui lơtrik đuăi hăng angĭn ƀơi kual Dap kơdư bưp tơnap tap amăng kual duh prăk mă yua lŏn mơnai, hăng hơmâo lu bruă bơkơsua hăng ngă rung răng, ƀơi tơring glông Ea H’Leo, tơring čar Daklak hơmâo truh kih amăng hơdôm ring bruă blung a. Rơnoh pơhrui mơng hơdôm ring bruă hrŏm hăng ba glăi tơlơi dưi mơnuih mơnam; tơpă sit, đing tơngia hmư̆, ngă tui djơ̆ tơlơi phiăn, anai lĕ akŏ phun kiăng kơ anom bruă tuh pơ alin, gong gai hăng mơnuih ƀon sang hơmâo tơlơi tu ư̆ hrŏm, djru brơi akŏ bruă anai ba glăi tơlơi dưi amăng bơwih ƀong huă-mơnuih mơnam, anai lĕ akŏ phun kiăng tŏ tui pơhưč tuh pơ alin lu ring bruă apui lơtrik pơđuăi hăng angĭn pơ anăp anai, tŏ tui mă yua anŏ dưi ƀơi ƀon lan.

Sang phrâo man pơdong prong 100 m2 mơng sang anŏ amai Phan Thị Hồng Phượng ƀơi ƀut plơi 5, să Đliê Yang, tơring glông Ea H’Leo, ataih mơng hơdôm gong apui lơtrik pơđuăi hăng angĭn mơng akŏ bruă Phong apui lơtrik Dap kơdư kơnong hơdôm rơtuh met đôč. Sang anai man pơdong hăng kơčong čư̆ hlâo adih ƀơi anai hơ-et uai biă mă, samơ̆ yua hơmâo ring bruă apui lơtrik pơđuăi hăng angĭn anai, arăng hơmâo man pơkra jơlan nao rai ngă kơ bruă nao rai gêh gal. Dua rơkơi bơnai amai Phượng hơmâo hluai tui tơlơi gal anai kiăng kơ pok sĭ gơnam tam, pla bơnga jum dar sang kiăng kơ tuai nao ngui dưi phĭn rup hrŏm hăng gong apui lơtrik pơđuăi hăng angĭn.

“Mơng hrơi man pơkra ring bruă man pơdong giong, mơnuih ƀon sang amăng ƀut plơi 5 dưi tŭ mă tơlơi dưi yua kơ jơlan tuh ƀêtong laih. Laih dong hlâo anun ƀu hơmâo hlơi ôh găn nao rai, ră anai lu tuai rai čuă ngui. Ƀing gơñu rai pơ anai či phĭn rup hrŏm  gong apui lơtrik pơđuăi hăng angĭn hăng jum dar anai ăt lăng hiam mơn. Tơlơi hơdip ƀơi anai pơplih biă mă, yua kơ hơmâo ring bruă apui lơtrik anai”.

Hơdôm ring bruă apui lơtrik pơđuăi hăng angĭn ba glăi prăk pơhrui lu biă mă amăng ngăn drăp ƀon lan

Ring bruă Phong apui lơtrik kual Dap kơdư ƀơi să Đliê Yang, tơring glông Ea H’Leo, lĕ ring bruă apui lơtrik pơđuăi hăng angĭn blung a ƀơi Daklak hăng kual Dap kơdư, yua kơ grup HBRE pok pơhai man pơdong mơng thun 2017. Ơi Nguyễn Hoàng Hiệp - Kơ-iăng khua wai lăng ring bruă anai brơi thâo, ring bruă apui lơtrik dưi pơđuăi 28,8 MW, hơmâo 12 boh turbin, bơdjơ̆ nao bruă duh prăk mă yua lŏn mơnai kơ 84 boh sang anŏ. Anai lĕ bruă bưp lu tơnap tap. 84 boh sang anŏ lĕ 84 tơlơi pơmĭn phara. Tơdah ƀu pơsir lăp djơ̆ amra hơmâo tơlơi bơrơjah, ƀom kiơng, ngă tơnap tap. Yua kơ hơmâo tơlơi gum hrŏm mơng gong gai hăng tơlơi gir run mơng anom bơwih ƀong sĭ mơdrô, hơdôm bruă gun găn hăng bruă duh prăk mă yua lŏn mơnai hơmâo pơsir hĭ lăp djơ̆. Ring bruă hơmâo man pơdong gêh gal hăng dưi pơđuăi apui lơtrik mơng blan 11 thun 2019. Ơi Hiệp brơi thâo:

“Jơnum min mơnuih ƀon sang tơring glông akŏ pơjing Grup gum djru amăng bruă mă yua lŏn mơnai kiăng kơ djru brơi anom bơwih ƀong sĭ mơdrô. Amăng hrơi blan ngă bruă, anom bơwih ƀong sĭ mơdrô gum hrŏm hăng Anom bruă wai lăng lŏn mơnai tơring čar, tơring glông hơmâo akŏ bruă duh prăk mă yua lŏn mơnai. Abih bang mrô prăk duh hơmâo lăi pơthâo tong ten. Jơnum min mơnuih ƀon sang hơdôm să hluai tui mrô sang anŏ duh prăk, mrô lŏn mơnai hăng gơnam pla amăng kual lŏn anai hơdôm hơƀơ̆i laih anun mơ-it nao anom bruă bơdjơ̆ nao tŭ yap hăng tơdơi anun pơphun bruă duh prăk mă yua lŏn mơnai kơ mơnuih ƀon sang”.

Tơdơi kơ tơlơi dưi mơng ring bruă Phong apui lơtrik Dap kơdư, tơring glông Ea Hleo tŏ tui pok pơhai sa ring bruă pơkŏn dong, prong 14 wŏt pơhmu hăng blung hlâo. Anai lĕ ring bruă Sang măi apui lơtrik pơđuăi hăng angĭn Ea Nam, yua grup Trung Nam tuh pơ alin.

Tui hăng ơi Nguyễn Văn Hà - Khua Jơnum min mơnuih ƀon sang tơring glông Ea H’Leo, tơlơi lông ră anai hăng ring bruă phrâo lĕ kiăng ngă pơgiong amăng ƀiă hrơi đôč anun lĕ 11 blan, hăng pơphun amăng hrơi blan hơmâo klin Covid-19 ngă lar hyu. Yua anun ră anai jai tơnap tap tui, sit biă ñu lĕ bruă duh prăk mă yua lŏn hăng hrơi mông pơkă kiăng pơgiong tañ, anom bruă tuh pơ alin lu wŏt glêh glar, hăng kiăng nao blơi lŏn mơnuih ƀon sang mơtăm ƀơi hơdôm ring bruă pơđuăi hăng angĭn pơkŏn. Yua kơ hơmâo gơgrong, gum hrŏm hăng gong gai ƀon lan, khul grup ngă kơ anom bơwih ƀong sĭ mơdrô pơsir hĭ tơnap tap. Anai lĕ tơlơi mơ̆ lu ring bruă pơkŏn glăk bưp, ră anai glăk tơnap pơsir hĭ.

Ring bruă Phong apui lơtrik Tây Nguyên lĕ ring bruă pơkĕ hăng hrĕ apui lơtrik dêh čar blung a ƀơi kual Dap kơdư

Ơi Nguyễn Văn Hà brơi thâo, kiăng kơ ring bruă tañ pơgiong, anom bruă tuh pơ alin kiăng nao tơl anih, gong gai lăi hiưm pă ngă tui anun mơn, pơsir bruă tơpă tong ten, djơ̆ hăng tơlơi ƀuăn. Hăng tơring glông Ea H’Leo, anai lĕ prăk kak kiăng tŏ tui pơhưč, pok pơhai man pơdong ring bruă pơkŏn, anăp nao mă yua abih tơlơi dưi pơđuăi apui lơtrik hăng angĭn 3.000 MW ƀơi ƀon lan.

“Rơwang blung a, lu mơnuih ƀu brơi ngă ôh, ƀing gơñu ƀu mut hrŏm. Ƀing gơmơi rơkâo ƀing tha plơi, khua plơi, Khua apăn bruă Ping gah amăng plơi pla hăng mơnuih arăng đăo gơnang gum hrŏm hăng mơnuih apăn bruă amăng să, khua mua tơring glông nao hiăp bit, pơblang rơđah brơi mơnuih ƀon sang thâo tơlơi dưi mơng hơdră bruă mơng tơring čar, tơring glông. Lơ̆m pơblang brơi rơđah, mơnuih ƀon sang hluh hăng tŭ ư ngă tui hơdră bruă anai. Ƀơi tơring glông Ea H’Leo mơng hlâo truh ră anai aka ƀu hơmâo bruă bơrơjah kơplah wah mơnuih ƀon sang hăng anom bơwih ƀong sĭ mơdrô tuh pơ alin man pơdong apui lơtrik pơđuăi hăng angĭn. Anai lĕ tơlơi gir run mơng ƀing gơmơi, tơlơi anai hơmâo pơgôp prong kiăng ngă pơgiong riung bruă apui lơtrik pơđuăi hăng angĭn ƀơi ƀon lan”.

Hrơi anai, Ea H’Leo hơmâo pơdah rơđah lĕ kual hơmâo tơlơi gal man pơdong ring bruă apui lơtrik pơđuăi hăng angĭn ƀơi kual Dap kơdư hăng giăm 100 gong, dưi ba glăi giăm 1 klai 300 klăk KWh apui lơtrik rĭm thun. Hrŏm hăng anun pơgôp hơdôm rơtuh klai prăk rĭm thun amăng ngăn drăp ƀơi ƀon lan, hơmâo dong apui lơtrik yua amăng dêh čar, anai lĕ hơdôm ring bruă djru man pơkra rơbêh 60 km jơlan ƀêtong djru brơi tơlơi hơdip kơ mơnuih ƀon sang hăng bơwih ƀong huă, djru man pơdong 13 boh sang gru grua hăng sang gum pơgôp …Tơlơi dưi mơng ring bruă apui lơtrik pơđuăi hăng angĭn ƀơi Ea H’Leo lĕ pran gơgrong kơtang, lăi hiưm pă ngă tui anun, pơhlôm kơplah wah tơlơi gơgrong hăng tơlơi dưi brơi abih bang.

Siu Đoan: Pơblang