VOV4.Jarai-Kơ-iăng Khua ding jum ia jrao ơi Nguyễn Trường Sơn phrâo tŭ ư kơ ƀôn prong HCM ngă lông lăng pơčlah ƀing F0 pơ sang anŏ hrom bruă pơčlah ƀing F1. Rơđah biă mă ñu, bruă brơi pơčlah ƀing F1 hăng ƀing hŭi ƀă kơtang ƀu djop tơlơi gêh găl tui hăng tơlơi pơtrun mơ̆ng Ding jum ia jrao pioh dŏ pơčlah pơ sang anŏ, hơmâo mơnuih F0 pơ sang anŏ kual hlăk hơmâo klin kah hăng sang apah dŏ, anih mơnuih ƀôn sang ƀun rin dŏ, anih pơčlah pơ sang hră…brơi nao dŏ pơčlah pơtum, mă ia khak pơčrang kman hăng măi RT-PCR hrơi tal 7 pơhrua hĭ anŏ pơkă hrơi tal 14 hlâo kơ anun, tơdah ƀu ƀuh kman brơi dŏ pơčlah pơ sang anŏ.

Kơ bruă dŏ pơčlah phara, pơjrao mơnuih ƀă laih kman iâu F0: Pô hlơi aka ƀu ƀuh duăm ôh lơ̆m ƀă laih kman dŏ pơjrao pơ sang ia jrao, tơdah mă ia khak pơčrang hăng măi RT-PCR hrơi tal 10 hơmâo boh tơhnal ƀu ƀuh kman ôh ƀudah ƀuh kman samơ̆ mrô virus ƀiă hloh brơi dŏ pơčlah pơ sang anŏ, hơmâo anih pơhlôm pơgang hơđong rơnuk rơnua.

Pok pơhai lông ngă tui hơdră pơčlah F0 ƀơi sang anŏ tơdah pô anun aka ƀu truh duăm ôh. Gơnong bruă ia jrao ƀôn prong HCM lăi pơtong, anom bruă ia jrao djop plơi pla krăo lăng tơlơi suaih pral rĭm hrơi hăng ƀing F0 dŏ pơčlah pơ sang; pơphun mrô telephôn ječ ameč pioh pơhing nao rai kơ mơnuih ƀă kman truh duăm, khom ba nao pơ sang ia jrao pơjrao.

Nay Jek: Pơblang