VOV4.Jarai - Tui hăng tơlơi jŭ yap mơng Ding jum pơtô hăng Pơjuăt, yap truh 5 mông tlam lơ 5/9, hơmâo 358 rơbâo čô čơđai pơplih anih kiăng hrăm, dưm dưm hăng 45% amăng mrô ƀing čơđai čih anăn hrăm gưl prong kiăo tui mrô puang pơplông abih anih 12 thun 2021 đĭ rơbêh 3% pơhmu hăng thun hlâo. Mrô mơnuih čih anăn hlâo hrơi pơplih phrâo lĕ rơbêh 3 klăk 800 rơbâo čô, tui anun yap lăng rim čô čơđai hơmâo rơkâo 4,8 tơlơi kiăng hrăm. Mrô mơnuih ngă hră rơkâo hrăm tơdơi kơ pơplih ming lĕ rơbêh 3 klăk 900 rơbâo čô čơđai, đĭ tui rơbêh 84 rơbâo hră rơkâo hrăm dong, yap lăng rim čô čơđai hơmâo nao rơkâo 4,9 tơlơi kiăng hrăm. Ding jum pơtô hăng pơjuăt ăt brơi thâo mơn, hơmâo rơbêh 78 rơbâo čô čơđai tŭ ư čih anăn mut hrăm ƀơi hơdôm boh sang hră hơmâo mơit đĭ amăng plang internet, đĭ 5 rơbâo čô pơhmu hăng thun hlâo. Tui hăng hrơi pơkă ruah čơđai hrăm hră mơng Ding jum pơtô hăng pơjuăt, mơng lơ 13/9 truh lơ 16/9, hơdôm boh sang hră hơmâo sem lăng ruah čơđai amăng tal 1. Hlâo kơ 5 mông tlam lơ 16/9, hơdôm boh sang hră lăi pơthâo bruă ruah tal sa.

Siu H’Mai: Pơblang