VOV4.Jarai - Tui hăng Ding jum wai lăng mơnuih mă bruă, tơhan rơka ruă hăng mơnuih mơnam, tơdơi kơ sa blan pok pơhai Tơlơi pơtrun pơsit mrô 68 mơng Kơnuk kơna kơ sa dua hơdră bruă djru mơnuih mă bruă hăng mơnuih mă yua mơnuih mă bruă bưp tơnap yua kơ klin Covid-19 (iâu klah čun lĕ Tơlơi pơtrun pơsit 68 mơng Kơnuk kơna) hăng Tơlơi pơsit 23/2021 mơng Khua dêh čar, mrô mơnuih mă bruă dưi djru amăng đơ đam dêh čar ta rơbêh kơ 13 klăk čô mơnuih, hăng abih bang mrô prăk giăm truh 6.000 klai prăk. Rơđah biă ñu, ƀôn prong Hồ Chí Minh tŭ mă pha brơi prăk djru kơ mơnuih ƀôn sang, mơnuih mă bruă 788 klai prăk. Tơring čar Bình Dương hmâo tŭ mă 349 klai prăk. Hà Nội tŭ mă 386 klai 800 klăk prăk, Bến Tre tŭ mă rơbêh kơ 32 klai prăk, Hậu Giang tŭ mă 12 klai 300 klăk prăk hăng lu tơring čar, ƀôn prong pơkon leng kơ dưi čơkă mă mrô prăk djru mơng Kơnuk kơna. Tơlơi lăp mơ-ak lĕ abih bang hơdôm bôh tơring čar, ƀôn prong hmâo gum hrom klă laih, ba glăi bôh tơhnal hăng tañ. Mơng anun, đơ đam dêh čar hmâo hơdôm pluh klăk čô mơnuih ƀôn sang dưi čơkă mă hơdră bruă gum djru, hơdôm klăk čô mơnuih mă bruă dưi čơkă mă prăk djru./.

Siu H’ Prăk: Pô pơblang