VOV4.Jarai - Tom brơi (9/6), ƀơi Hà Nội, Ding jum Kông ang pơphun jơnum Grŭp črâo ba rơwang bruă Pơdŏng mrô djă pioh mơng lŏn ia kơ anih mơnuih ƀôn sang dô̆ hăng rơwang bruă bơwih ƀong huă, pơsit hăng wai lăng hră căn cước công dân. Đại tướng Tô Lâm, Ding kơna Ding jum kơđi čar, Khua Ding jum kông ang, Khua Grŭp črâo ba bruă jơnum. Yap truh lơ 7/6, hmâo laih rơbêh kơ 35 klăk čô mơnuih dưi pơsit anăn păn. Pơkă hlâo truh lơ 18/6, Ding jum Kông ang amra pơphun pơsit brơi năng ai ñu 90% mrô pơsit anăn păn kơ mơnuih amăng đơ đam dêh čar ta. Ơi Tô Lâm lăi rơđah, Kông ang hơdôm anom bruă, plơi pla ƀu dưi lui raih ôh, lăng lăp djơ̆ hăng bôh tơhnal dưi ngă ôh mơ̆, khom pơsit pran jua, gir run hloh kiăng ngă giong klă hơdôm bruă ba tơbiă, ƀơi anăp lĕ hơdôm bruă mă ječ mơng ră anai truh lơ 1/7, hăng hơdôm bruă djă pioh na nao tơdơi kơ lơ 1/7. Hrom hăng anun rơkâo Anom bruă tơhan polih wai lăng hră pơ-ar gah hơđong mơnuih mơnam pơtrut dong Kông ang hơdôm plơi pla ngă giong bruă mă klă mrô djă pioh, ha amăng plĕ amăng glông bruă kiăng pơsit mrô pơsit anăn kơ mơnuih amăng lơ 18/6/2021 tui tơlơi pơkă mrô klă agaih truh dơ̆ hơpă pơsit mrô pơsit anăn mơnuih dơ̆ anun./.

Siu H’ Prăk: Pô pơblang