VOV4.Jarai - Amăng jơnum pơčrông sai grup khua mua pơ ala mơnuih ƀon sang kơ črăn tơlơi pơsit hơdră mă yua ngăn drăp djru pok pơhai Jơlan hơdră hơkrŭ glăi hăng pơđĭ kyar bơwih ƀong huă - mơnuih mơnam, bơdjơ̆ nao bruă tuh pơ alin bruă čar, ơi Trần Hoàng Ngân - khua anom bruă kơsem min pơđĭ kyar ƀôn prong Hồ Chí Minh brơi thâo: Amăng 2 klăk 870 rơbâo klai tuh pơ alin amăng đơ đam dêh čar rơwang thun 2021-2025, dŏ giăm 297.000 klai aka ƀu kah pha, kiăng mă yua tuh pơ alin ƀơi hơdôm ƀon lan him lăng amra ngă đĭ tui rơnoh pơhrui ngăn drăp kơnuk kơna. Tui hăng ơi Trần Hoàng Ngân, hơdôm kual amra ba glăi prăk pơhrui amăng ngăn drăp kơnuk kơna lĕ kual Ngŏ Dơnung. Him lăng ngăn drăp pơhrui thun 2022, pơhrui ngăn drăp đơ đam dêh čar lĕ 1 klăk 500 rơbâo klai prăk, kual Ngŏ Dơnung truh pơ 40%. Ră anai, Ding jum wai lăng jơlan glông hơmâo hră mơ-it Khua pơ ala mơnuih ƀon sang dêh čar 12 akŏ bruă mă yua prăk tuh pơ alin man pơkra jơlan Kơdư-Dơnung. Amăng anun, kual Ngŏ Dơnung hăng kual ia dăo Cửu Long kơnong 2 akŏ bruă, lơ̆m ră anai jơlan glông ƀơi kual Dơnung glăk aka ƀu pơkra ming hiam hruaih kar hăng kual Kơdư.

Siu Đoan: Pơblang